Në “Ramazan Njala” rikthehet pas katër vjetësh një veprimtari e rëndësishme e basketbollit shqiptar. Kryeqyteti, edhe pse ka shumicë në skuadrat e kualifikuara për fazën finale, nuk organizon dot prej infrastrukturës. Durrësi dhe Shkodra do të jenë mikpritësit e Kupës së Shqipërisë në basketboll për femra e meshkuj, që do të jenë pararendëse të startit të fazës së tretë më 26 dhe 27 shkurt 2016. Kështu, Kupa e Shqipërisë në basketboll për femra do të luhet në “Ramazan Njala” të Durrësit.

Ky ka qenë vendimi i kryesisë të martën në mbrëmje e kjo jo vetëm për të rizgjuar nga letargjia klubin shumësportësh “Teuta”, që duhet ta ketë edhe një ekip në basketboll për femra. Po për meshkuj? Asnjë lloj ndryshimi. Luhet përsëri në “Qazim Dervishi” të Shkodrës, ndërsa Vllaznia, si shtëpiake në këtë impiant, e nis Kupën e Shqipërisë me një plus më të madh se sa kundërshtarët. E thënë ndryshe me “fitoren në xhep”. Apolonia, që nuk është më, dhe Vllaznia janë fituesit e Kupës në fuqi.

E keqja e kësaj veprimtarie është fakti se kryeqytetasit, edhe pse janë në shumicë (Kamza Basket meshkuj e femra, Tirana meshkuj e femra, Partizani meshkuj), nuk marrin dot përsipër organizimin. E kjo për shkak të mungesës së infrastrukturës, sepse “Farie Hoti” vijon të jetë i përjashtuar si opsion jo vetëm për “play-off”-in për titull kampion, por dhe për Kupën e Shqipërisë. Kurse “Asllan Rusi” nuk plotëson kriterin e temperaturës, ndërsa parashikohet që fundi i shkurtit të jetë i ftohtë.

Kësisoj Durrësi dhe Shkodra janë mikpritësit e Kupës së Shqipërisë në basketboll për sezonin 2015-2016.

Kupa e Shqipërisë

Basketboll – Femra

Kalendari i fazës finale

(Pallati i Sportit “Ramazan Njala”, Durrës)

Gjysmëfinalet:

(12 shkurt 2016)

Flamurtari – Kamza Basket                        ora 16:00

Tirana – Skënderbeu                                  ora 18:00

Finalja             

13 shkurt 2016                                             ora 17:00

Kupa e Shqipërisë

Basketboll – Femra

Kalendari i fazës finale

(Pallati i Sportit “Qazim Dervishi”, Shkodër)

Gjysmëfinalet:

(17 shkurt 2016)

Kamza Basket – Partizani              ora 17:00

Vllaznia – Tirana                              ora 19:00

Finalja

18 shkurt 2016                                 ora 18:00