Katër vjet mungesë, ndërsa më së fundi kombëtarja e Shqipërisë në basketboll për meshkuj është rikthyer në arenën ndërkombëtar. Kuqezinjtë, ashtu sikurse dhe 26 kombëtare të tjera, mes tyre dhe Kosova, kanë qenë dje në shortin që është hedhur në Mynih të Gjermanisë për Eliminatoret e Kampionatit Evropian 2017. Tanët ndodhen në grupin F me Gjeorgjinë, Malin e Zi dhe Sllovakinë dhe në një hark kohor prej gati tre javësh, që nga fundi i gushtit e deri në mesin e shtatorit, do të jenë në parket. E nisin në Gjeorgji për ta mbyllur në fushën tonë ndaj Sllovakisë.
Një short i vështirë, por jo i pamundur për t’u paraqitur denjësisht. Sakaq Kosova do të jetë në grupin E së bashku me Slloveninë, Ukrainën dhe Bullgarinë. Sipas formatit të ndërtuar nga Federata Evropiane e Basketbollit 27 skuadrat janë ndarë në gjashtë grupe me nga katër ekipe dhe një është me tre. Dhe fituesit e grupeve, si dhe katër më të mirat e vendeve të dyta shkojnë në raundin final të Kampionatit Evropian të Basketbollit për vitin 2017, atje ku do t’i bashkohen Finlandës, Izraelit, Rumanisë dhe Turqisë.
Finalistët e parë janë Spanja, Lituania, Kroacia, Republika e Çekisë, Franca, Greqia, Italia, Letonia dhe Serbia. Grupet e tjera të kualifikueseve në periudhën 31 gusht – 17 shtator janë kështu: Grupi A (Belgjika, Islanda, Zvicra, Qipro), Grupi B (Gjermania, Holanda, Austria, Danimarka), Grupi C (Rusia, Bosnja-Hercegovina, Suedia), Grupi D (Polonia, Estonia, Bjellorusia, Portugalia), Grupi G (Maqedonia, Hungaria, Britania e Madhe, Luksemburgu). Përfundimisht me një grup “ferri”, Shqipëria e basketbollit të meshkujve shpreson të bëjë më të mirën e saj.
Kampionati Evropian
i Basketbollit – Meshkuj
Grupi F
(31 gusht – 17 shtator 2015)
- Gjeorgji
- Mali i Zi
- Sllovaki
- Shqipëri
Kalendari i ndeshjeve të Shqipërisë
31 gusht 2016 Gjeorgji – Shqipëri
3 shtator 2016 Shqipëri – Mali i Zi
7 shtator 2016 Sllovaki – Shqipëri
10 shtator 2016 Shqipëri – Gjeorgji
14 shtator 2016 Mali i Zi – Shqipëri
17 shtator 2016 Shqipëri – Sllovaki
