ASNN – Barcelona është shpallur për herë të 5-të kampione e Evropës, pasi ka mundur 3-1 Juventusin, në finalen e luajtur të shtunën në mbrëmje në “Olimpia-stadion” të Berlinit. Pjesa e parë e kësaj ndeshjeje ka nisur praktikisht me gol, pasi Barcelona, me një aksion të shkëlqyer me pasime të shkurtëra, ka arritur të shënojë me anë të Rakitiçit. Goli i ka tulatur juventinët, ndërsa katalanët kanë kaluar në lojën e tyre të zakonshme, me kontroll të dendur të topit, ndonëse për italianët, Bufoni është bërë vendimtar me një tjetër pritje refleksive.
45 minutat e para do të mbyllen me epërsinë njëgolëshe të spanjollëve, ndërsa në pjesën e dytë, Juventusi do të guxojë më tepër dhe, vetëm pas 10 minutash lojë, është i lojtari i Realit të Madridit, Alvaro Morata, ai që do të shënojë golin e barazimit, pasi një goditjeje të argjentinasit Tevez, që veçse sa u grushtua nga portieri i Barcelonës. Goli u ka dhënë zemër italianëve, të cilët rrezikojnë, por, duke përfituar edhe nga loja e hapur, Barcelona do të gjejë edhe golin e dytë, kur një goditje e Mesit nga jashtë zone, është grushtuar nga portieri Bufon dhe Luis Suarez do ta përcjellë topin në rrjetë në minutën e 68-të.
Pak minuta më pas, Barcelona do të gjejë edhe golin e tretë, por ai do të anulohet për një prekje të topit me dorë nga braziliani Nejmar. Megjithatë, ai e ka gjetur golin në minutën e 6-të shtesë, duke vulosur fitoren 3-1 të Barcelonës. Kjo finale është ndjekur edhe nga qindra sportdashës të mbledhur në hapësirën e gjelbërt pranë Kryeministrisë, ku i pranishëm ka qenë edhe vetë Kryeministri Edi Rama. Ai ka ndarë me ta emocionet e kësaj superfinaleje, ndërsa në pushim të ndeshjes i ka uruar rrugë të mbarë dhen fat edhe delegacionit shqiptar që do të marrë pjesë në Lojërat e Para Olimpike Evropiane, që do të mbahen në Baku të Azerbajxhanit.
