ASNN – Sa kohë në fushë është Lionel Mesi, Barcelona do të njohë suksese. Edhe pse penalltia e dhënë në fillim të ndeshjes në favor të skuadrës katalane ishte e dyshimtë, për të mos thënë e paqenë, nuk mund të vihet në diskutim aftësia e Barcelonës dhe merita e saj për fitoren dhe kualifikimin në raundin tjetër të Ligës së Kampioneve. Mbrëmjen e së mërkurës Barça priti në “Kamp Nou” ekipin francez të Lionit, të cilin e mundi me rezultatin e thellë 5-1.
Ishte pikërisht 11-metërshi i shndërruar në gol nga Mesi që i hapi rrugën një fitoreje të thellë. Por argjentinasi do të linte gjurmë të forta në këtë takim, pasi shënoi dy gola dhe dhuroi dy pasime goli, duke qenë vendimtar dhe duke iu përgjigjur flakë për flakë Ronaldos që një ditë më parë kualifikoi Juventusin përballë Atletikos me një 3-golësh të mrekullueshme. Menjëherë pas Mesit, që shënoi me 11-metërsh, ishte braziliani Kutinjo që realizoi golin e dytë në minutën e 31-të, pasi u pasua saktë nga Luis Suarez.
Pjesa e parë mbyllet me shifrat 2-0, por Lioni do të hapte ndeshjen në fillim të pjesës së dytë, me golin e Tusarit, në minutën e 58-të. Sidoqoftë, Barcelona nuk do ta linte ndeshjen për minutat e fundit dhe të merrte rrjedhë të papritur. Për këtë mendoi vetë Mesi, i cili realizoi një gol me vlera në minutën e 78-të, duke larguar ankthin nga ekipi i tij dhe duke i kthyer frymëmarrjen stadiumit “Kamp Nou”. Lioni tenton të shtyjë përpara për të bërë surprizën.
Sepse dihej që ndeshja e parë ishte mbyllur 0-0 dhe një barazim me gola do të kualifikonte francezët. Por ishte sërish Mesi që gatoi nga këmbët e tij dy pasime ideale goli, fillimisht për mbrojtësin Zherard Pike që shënoi në minutën e 81-të, si dhe për Osman Dembelenë e futur në pjesën e dytë që shënoi në minutën e 86-të. Me fitoren e thellë 5-1 mbyllet kjo ndeshje dhe Lioni eliminohet, ndërsa Barcelona do të vazhdojë rrugëtimin e saj drejt trofeut.
Teksa pret e qetë hedhjen e shortit pas zhvillimit edhe të ndeshjeve në Ligën e Evropës, duele të cilat do të luhen të enjten në mbrëmje.
Ekipet çerekfinaliste të Ligës së Kampioneve
- Ajaksi
- Barcelona
- Juventusi
- Liverpuli
- Mançester Junajtid
- Mançester Siti
- Porto
- Totenhemi
