Federatat detyrohen të ndërrojnë emrat e sportistëve, sepse kërkohen garues të elitës. Digjen Jurgen Uldedaj, Iltian Nika dhe Redian Kopshti, janë nën moshën e kërkuar(?!) Moshat duket se kanë penalizuar talentet e sportit shqiptar për të marrë pjesë në Lojërat Olimpike Evropiane “Baku 2015”, të cilat zhvillohen më 12-28 qershor. Ndryshe nga çfarë ishte thënë më parë, teksa që në ditët e para të janarit Federata Shqiptare e Çiklizmit do të deklaronte që Iltian Nika dhe Redian Kopshti janë të kualifikuar me normë për në Lojërat Olimpike Evropiane, sot është një tjetër situatë.
Sipas asaj që referohet nga drejtuesit e Federatave sportive pjesëmarrëse në këto Lojëra Olimpike nga organizatorët janë kërkuar sportistë elitar të datëlindjes 1975-1996. Dhe për rrjedhojë janë djegur të paktën në boks dhe në çiklizëm Jurgen Uldedaj, Iltian Nika dhe Redian Kopshti. Por a është normale? Në fakt Nika rezulton i datëlindjes 1995 dhe për rrjedhojë është brenda kësaj grupmoshe që kërkon pjesëmarrja në Lojërat Olimpike “Baku 2015”.
Jo vetëm kaq, por duke iu referuar bursistëve të Komitetit Olimpik Kombëtar Shqiptar, ato që janë të vlefshëm për në Lojërat Olimpike në Baku janë Anxhela Kashari në not (datëlindja 1996), Luiza Gega në atletikë (datëlindja 1988). Të tjerët, jo vetëm për shkak të moshës, por dhe ndoshta prej cilësisë nuk mbërrijnë në Baku, ndërsa këtu dhe bursa e tyre zhvlerësohet. Megjithatë kjo çorbë e krijuar për shkak të datëlindjeve të sportistëve që duhet të marrin pjesë me normë, apo me ftesë në Lojërat Olimpike Evropiane “Baku 2015”, ndoshta është dhe prej keqinformimit nga Komiteti Olimpik Kombëtar Shqiptar.
Sepse në realitet që nga 20 qershori i vitit të kaluar, kur shefi i misioni Hysen Domi ka bërë mbledhjen e parë me të gjithë sekretarët e federatave sportive, ndërsa ishte thënë që më 1 shtator të vitit të kaluar do të kishte referenca për institucionet sportive për garat kualifikuese (pjesëmarrja në konkurrim është bërë mbi bazën e rezultateve të arritura në Kampionatet Evropiane gjatë vitit 2014) nuk ka pasur asnjë takim me këto sekretarë.
Sot kanë mbërritur letrat për plotësim, diku me normë, diku me ftesë. Por ajo që duket se i penalizon talentet është mosha, gjithnjë nëse vërtetë nuk ka përzgjedhje selektive nga Federatat të mbuluara me atë se nuk e kanë moshën për të shkuar në “Baku 2015”, ndonëse është i vlefshëm për t’u kualifikuar për në Lojërat Olimpike “Rio de Zhaneiro 2016”.
