ASNN – Heqja e rregullit të golit në fushë të huaj mund ta dëmtojë skuadrën e Simeones. Dhe ende pa u luajtur ndeshja e parë, skuadra spanjolle e Atletikos së Madridit mund të ketë humbur një armë të fortë të saj përballë Mançester Junajtid. Para nisjes së këtij sezoni, UEFA bëri të ditur heqjen e rregullit në fushë të huaj, çka në fakt mund të jetë një ogur i keq për skuadrën e Simeones.
Atletiko e Madridit përballet me Mançester Junajtid në turin e 16-shes së Ligës së Kampioneve dhe ende pa u luajtur ndeshja e parë, skuadra spanjolle mund të ketë humbur një armë të fortë të saj. E drejtuar nga trajneri Diego Simeone, skuadra madrilene është njohur për mendësinë e saj të mbrojtjes së hekurt, duke i thyer psikologjikisht skuadrat kundërshtare nëpërmjet zmbrapsjes së sulmeve të tyre të njëpasnjëshme.
Trajneri argjentinas ka një skuadër tejet të disiplinuar dhe ajo është përgjithësisht një makth për ekipet kundërshtare, pavarësisht se sa të mëdhenj janë këta të fundit. Ndonëse forma e dobët që Atletiko e Madridit po kalon këto kohët e fundit mund t’u ketë dhënë shpresë tifozëve të Mançester Junajtid, sidomos forma e portierit Jan Oblak, teksa sllovaku, një nga më të mirët në botë, ka pësuar 30 gola në 24 ndeshjet e fundit dhe e ka mbajtur portën vetëm në 6 ndeshje të paprekur, është një tjetër faktor që mund të rezultojë vendimtar.
Para nisjes së këtij sezoni, UEFA bëri të ditur heqjen e rregullit në fushë të huaj, çka në fakt mund të jetë një ogur i keq për Atletikon e Madridit. Kjo sepse golat në fushë të huaj gjithmonë kanë rezultuar në favor të stilit tejet pragmatik të lojës së skuadrës së Simeones. Në 2020-ën, kur Atletiko e Madridit eliminoi fituesen në fuqi të Ligës së Kampioneve, Liverpulin, ajo përfitoi shumë nga rregulli i golit në fushë të huaj.
Duke qenë se Liverpuli nuk kishte shënuar takimin e parë në kryeqytetin spanjoll dhe Atletiko e çoi ndeshjen në kohët shtesë, ajo kishte 30 minuta në dispozicion për të shënuar një gol që do t’i detyronte anglezët të shënonin dy. Ndonëse Liverpuli shënoi edhe një tjetër në shtesë, skuadra e Simeones shfrytëzoi kundërsulmin për të shënuar 3.
Por, duke folur pas ndeshjes, edhe vetë Simeone e pranoi se ky rregull i dha skuadrës së tij një epërsi të padrejtë. “Sot ishte e padrejtë, sepse patëm 30 minuta kohë në dispozicion për të shënuar 3 gola në fushë të huaj dhe Liverpuli nuk e pati këtë mundësi”, – pati thënë trajneri argjentinas, duke vijuar: “Kjo nuk është e drejtë. Ky rregull na favorizoi sot, por mund të na ndëshkojë në të ardhme dhe kjo është gabim.”
