Vllaznia ka pretenduar në garën e të rriturve në distancën e 10 kilometrave se atleti bardheblu, Marko Makaj, është tërhequr me biçikletë. Gjyqtaria e ka mohuar të ketë ndodhur një gjë e tillë. Por tashmë gjithçka është “dyllosur”, sepse me vendimin dhe fjalën e gjyqtarët që “nuk kemi parë gjë dhe nuk ka ndodhur asgjë”, Tirana është kampione në 10 kilometra të rritur.
Ndërkohë më parë ka qenë e shpallur e tillë edhe në 4 kilometra të reja së bashku edhe me talentin e atletikës shqiptare Relaksa Dauti. Apo dhe në 6 kilometra për të rinj, ndonëse si individ ka dalë fitues elbasanasi Rexhino Bardhi. E më pas dhe 8 kilometra për të rritura, megjithëse tre vendet e para individuale janë ndarë mes atletëve të Teutës. Në krosin kombëtar të këtij viti kanë marrë pjesë 7 ekipe: Mjeshtëria Sportive Durrës, Tirana, Teuta, Flamurtari, Vllaznia, Elbasani dhe Skënderbeu.
Të shtata këto skuadra në katër disiplina të krosit kanë sjellë mbi 50 konkurrues. Dhe me përjashtim të debatit për garën e 10 kilometrave, që nga arbitrat nuk ka munguar të thuhet se ka qenë e stisur dhe e shtyrë edhe nga palë të tjera, e gjithë pjesa tjetër e garës kanë qenë korrekte dhe shumë e mirë. Sepse bashkë me atletët, edhe pse ishte ditë e hënë, kanë vrapuar e kanë ecur për shëndet edhe qytetarët e Tiranës.
Ky kros kombëtar, dominuar me katër tituj kampion nga Tirana, duket sikur pjesë rekreative e Kodrave të Liqenit, atje ku Bashkia e kryeqytetit është duke ndërhyrë për ta kthyer plotësisht në dispozicion të qytetarëve të saj në të gjitha grupmoshat. Përfundimisht, Tirana është kampionia e krosit kombëtar 2016.
Krosi Kombëtar 2016
Rezultatet teknike:
4 kilometra (Të reja)
Relaksa Dauti (Tirana) 15’19”00
Si ekip: Tirana 7 pikë
6 kilometra (Të rinj)
Rexhino Bardhi (Elbasani) 21’05”06
Si ekip: Tirana 10 pikë
8 kilometra (Të rritura)
Ortisa Salillari (Teuta) 39’03”03
Si ekip: Tirana 9 pikë
10 kilometra (Të rritur)
Ilir Këllezi (Skënderbeu) 33’22”00
Si ekip: Tirana 12 pikë
