SNN – Nuk e ka fshehur kënaqësinë dhe këtë radhë e ka të përligjur, sepse, më në fund, e për më tepër, atëherë kur duhej, sportistja e tij ka kapërcyer atë që e kishte penguar më tepër, aspektin psikologjik dhe ka bërë një garë të shkëlqyer në etapën e parë të “Diamond Ligë”, që u mbajt sonte në Doha të Katarit, duke shkruar historinë e atletikës shqiptare dhe duke arritur, në një garë të vetme, të përmbushte disa qëllime njëkohësisht.
Pak minuta pas përfundimit të garës atje larg, në Lindjen e Mesme, telefoni i Taulant Stërmasit këtu në Tiranë nuk rreshtte së rëni dhe ishim me fat që e kapëm përpara se lista e thirrjeve të humbura apo në pritje, të bëhej edhe më e gjatë. “Natyrisht që jam i kënaqur, madje i lumtur, sepse, edhe pse do të kisha dëshiruar të isha aty, në Katar, emocionet i kam të njëjta”, – pohoi trajneri i Luiza Gegës, duke folur ekskluzivisht për AlbanianSport.com pas minuta pas përfundimit të garës.
Sikundër e kishte pohuar edhe sot vetë Taulanti, në intervistën ekskluzive dhënë AlbanianSport.com, sportistja e tij shtatshkurtër ka shpërthyer në garën e 1,500 metrave, duke u renditur e 5-ta në botë, duke renditur e 5-ta midis 16 sportisteve më të mira në botë të kësaj disiplinë, me kohën 4 minuta, 2 sekonda e 63 të qindtat. Kjo kohë shënon edhe thyerjen e rekordit kombëtar të 1,500 metrave, të cilin Luiza Gega e mbante vetë me 4 minuta, 3 sekonda e 12 të qindtat.
“Nuk dua të bëj fallxhorin, por nuk kam patur për asnjë çast dyshim se Luiza mund ta arrinte një gjë të tillë, – vijoi Stërmasi, duke folur për AlbanianSport.com. – Këtë bindje e kisha krijuar nga gjendja e sportistes sime, e cila pati fatin e keq ta humbiste Evropianin e Sallave të Mbyllura për shkak të një stërlodhjeje që erdhi në kohën e gabuar. E kam thënë dhe e përsëris prapë, që Luiza Gega është një nga sportistet më të mira në botë të 1,500 metrave për momentin dhe ftesa që i erdhi nga “Diamond Ligë”, nuk ishte rastësi.”
Dhe sikur të mos mjaftonte renditja e 5-ta në botë dhe thyerja e rekordit kombëtar, me kohën e arritur sonte në Doha të Katarit, Luiza Gega ka kapur edhe normën e kualifikimit për në Lojërat e ardhshme Olimpike, “Rio 2016”, duke u bërë kështu e para sportiste shqiptare që siguron pjesëmarrjen në Olimpiadën e vitit të ardhshëm në Brazil, pasi norma olimpike ishte nën 4 minuta e 6 sekonda. Dhe trajneri i saj nuk e fsheh se kjo i jep mundësi që garat e ardhshme, atletja t’i bëjë pa peshën e presionit.
“Nuk kisha aspak dyshim që do të ishim patjetër nën kohën e kërkuar për normën olimpike, pasi Luiza ka potencial të arrijë edhe nën 4 minuta, – ka vijuar Stërmasi. – Rëndësi ka që e kapi që tani normën dhe paskëtaj mund të garojë e qetë.” Duke i bërë një analizë garës së Gegës, e cila u përball me 16 më të mirat e botës në garën e 1,500 metrave, trajneri i saj e pohon se atletja shtatshkurtër u ndihmua nga fakti se gara e sotme u zhvilluar praktikisht në grup.
“Po ta shikoni me kujdes renditjen përfundimtare, do të vëreni, se 8 sportistet e para i ndajnë nga njëra-tjetra vetëm 5 sekonda dhe kjo dëshmon se ka qenë një garë e ngjeshur, – analizon Taulanti. – Më tepër se kaq, Luiza u ndihmua nga fakti se u garua në grup, çka u mundësoi sportisteve të bënin një garë të rregullt, pa sforcime dhe goditje. Sigurisht që mund të kishte qenë edhe më mirë, por si sportistja e parë shqiptare që renditet kaq lart në “Diamond Ligë”, nuk më duket se vendi i 5-të është keq.”
Në fund, “gjuha shkon aty ku dhëmb dhëmballa” dhe trajneri i Luiza Gegës bën thirrje për mbështetje. “Luiza Gega nuk është më thjesht një sportiste shqiptare, por një sportiste e kalibrit botëror dhe për një vend si Shqipëria, duhet të jemi me fat që e kemi, – thekson ai, duke folur për AlbanianSport.com. – Por jemi në fazën kur na nevojitet më tepër se kurrë mbështetje e gjithanshme, në mënyrë që Luiza të stërvitet, të përgatitet dhe të garojë si një sporti e nivelit ndërkombëtar.”
