Trajneri i rekordmenes, Luiza Gega: “Gjatë vitit 2015, sportistja e ka arritur tre herë normën e pjesëmarrjes në Lojërat Olimpike. Aktualisht ka një formë të shkëlqyer e krahasuar me dy vjet më parë në Kenia është shumë më mirë. Luiza e ka arritur normën e kualifikimit të Lojërave Olimpike “Rio de Zhaneiro tre herë brenda vitit”.
“Dhe për t’u bindur për këtë gjë mund t’i referoheni buletineve të Federatës Botërore të Atletikës, – ka vijuar ai. – E jo vetëm kaq, por atje mund të bindeni dhe për kohën që duhet për të kapur normën e kualifikimit për në Olimpiadë, e cila është 4’07”00. Kualifikimi i sportisteve ka nisur që më 1 maj 2015 dhe është deri më 15 korrik 2016.”
“Gjatë vitit 2015, Gega ka arritur kohën 4’02”63 në “Diamond Ligë” në Doha të Katarit, e cila është rekord kombëtar për Shqipërinë. Po kështu në Pekin në “Uërlld Çellenxh” ka kohën 4’04”20, si dhe në “Diamond Ligë” në Romë ka fiksuar kohën 4’03”01.
“Parë kështu, Gega është tre herë kapëse e normës së kualifikimit për në Olimpiadë”, – ka theksuar Stërmasi nga Iten i Kenias. Dhe këtu bëhet fjalë vetëm për 1500 metra, sepse me kohët e saj një gjë të tillë e ka të mundur edhe në 800 metra.
