“Sigal Uniqa Group” dhe Drejtori i saj i Përgjithshëm, Avni Ponari, që është njëkohësisht dhe presidenti i Federatës Shqiptare të Basketbollit, janë sponsorët zyrtarë të rekordmenes Luiza Gega. Këtë e ka pranuar vetë rekordmenia, e cila ka një sërë falënderimesh për të gjitha ata që i kanë mundësuar këtë përgatitje 9-javore në Kenia.

“Së pari, – thotë Luiza Gega, më duhet të falënderoj Komitetin Olimpik Kombëtar Shqiptar, që ka bërë të mundur mbulimin e shpenzimeve të mia nëpërmjet bursës olimpike. Shpenzimet e trajnerit tim Taulant Stërmasi janë mbuluar nga Federata Shqiptare e Atletikës.”

“Dhe kjo ka qenë nisma e Presidentit Gjergji Ruli dhe Sekretarit të Përgjithshëm, Nikolin Dionisi, të cilët gjej rastin t’i falënderoj. Por mbi të gjitha një falënderim i veçantë shkon për “Sigal Uniqa Group” dhe zotin Avni Ponari, të cilët për vitin 2016 do të jenë sponsorët e mi të përgjithshëm”, – ka përfunduar Gega.

4’07”84 është rekordi kombëtar në salla të mbyllura në 1500 metra, të cilin e mban po vetë Luiza Gega, rekord të cilin kërkon ta thyejë gjatë Botërorit të Portlandit, më 17-20 mars. Ndërsa 4’02”63 është rekordi kombëtar në 1500 metra në pista të hapura, të cilin e ka realizuar vitin e kaluar në Doha të Katarit, por që kërkon ta thyejë përsëri gjatë veprimtarive ndërkombëtare të këtij viti.