ASNN – Gjergj Ruli në “qiellin e shtatë”: Atletika Shqiptare shkëlqeu në Stamboll. I entuziazmuar nga rezultatet e sportistëve tanë në Kampionatin Ballkanik të Sallave të Mbyllura që po zhvillohet në Stamboll, presidenti i Federatës Shqiptare të Atletikës, Gjergj Ruli, nuk e fshehu gëzimin dhe emocionin që i ka përçuar paraqitja e ekipit kombëtar, veçmas 3 sportistët, Luiza Gega, Izmir Smajlaj dhe Franko Burraj. Ruli kujtoi se atletika shqiptare ka potencial dhe elementë të shkëlqyer dhe e tregoi dhe një herë tjetër veten në këtë veprimtari, duke u dëshmuar si një prej ekipeve më të mira ballkanike.
Në veçanti, Ruli i cilësoi të shkëlqyera rezultatet sportistëve, që sipas tij dëshmojnë qëndrueshmëri dhe arritje, por njëherësh frymëzim për veprimtaritë madhore të këtij viti, duke nisur nga Evropiani i Gllasgout. “Ne patëm rezultate fantastike në këtë veprimtari dhe atletika shqiptare u paraqit në mënyrë të shkëlqyer, – u shpreh Ruli, dukshëm i entuziazmuar nga rezultatet dhe medaljet. – Izmir Smajlaj bëri një garë të madhe, por sic dihet kërcimi së gjati është garë specifike që kërkon shumë teknikë dhe ku diferencën e bëjnë detajet e vogla. Për Izmirin ky ishte një rezultat stërvitor, sepse kërcimet që ai ka bërë janë shumë më të larta.”
“Prova e mirë në këtë garë është si një test për ne në Kampionatin Evropian, pasi të mërkurën ne do të nisemi për në Gllasgou”, – ka vijuar kreu i organizmit që qeveris “mbretëreshën shqiptare të sporteve”. – Ndërkohë, Luiza Gega konfirmohet edhe një herë si sportiste e kalibrit të lartë, dëshmuar me medaljen e artë, kurse Franko Burraj theu rekordin kombëtar në 400 metra. Për mua kjo është një paraqitje e shkëlqyer e Shqipërisë në Kampionatin Ballkanik, por për mua nuk është më i tillë, pasi marrin pjesë mbi 20 shtete, përfshi dhe Azerbajxhanin. Tani shpresojmë medalje në Evropian, ndonëse është shumë e vështirë, sepse konkurrenca është shumë e lartë.”
“Atje ka sportistë nga vendet më të zhvilluara të botës, kurse ne nuk kemi një pistë atletike”, – përfundoi Presidenti i Federatës Shqiptare të Atletikës, Gjergj Ruli.
