Ashtu sikurse është lajmëruar dhe një ditë më parë, Kampionati Kombëtar i Nën-18-vjeçarëve në Atletikë ka qenë i ndarë mes Tiranës dhe Elbasanit. Për shkak të mungesës së kushteve në Stadiumin “Elbasan Arena”, ndërsa edhe për të kryer hedhje, apo kërcimin së larti, duhet paguar, atëherë drejtuesit e Federatës Shqiptare të Atletikës kanë qenë të detyruar këto disiplina t’i kryejnë në Tiranë.

Në Stadiumin Kombëtar “Qemal Stafa” në Tiranë është bërë kërcimi së larti, kurse hedhjet në këndin e ish-kompleksit “Dinamo”, që po bën një dekadë që ka dalë jashtë funksioni. E Partizani ka dominuar e kjo falë kujdesit të Emiljana Cikos, apo Laura Derhemit, sot në rolin e trajneres, ndërsa Pamela Asllani në hedhjen e gjyles e të diskut, Tea Fetaj dhe Renild Xhufi në kërcim së larti.

Por edhe Emiljano Myftari në hedhje gjyle, bashkë me të tjerët, i kanë dhënë pikë si “kampion” skuadrës së kuqe. Sigurisht që nuk duhet lënë mënjanë Marsida Dini, hedhësja e çekiçit, që është nën drejtimin e kryetrajnerit të kombëtares dhe specialistit të hedhjeve, Vaso Selenica. Apo Kristi Cepa i Skënderbeut kampioni i diskut, apo hedhësit e shtizës së Mjeshtërisë Sportive Durrës, Gentian Dyrmishi dhe Marsela Luzi.

Madje kjo e fundit është “kampione” me një hedhje, sepse në një tjetër ka bërë dëmtim të meniskut, ndërsa ka ardhur në vete falë ndërhyrjes së kryegjyqtarit të garave, Filip Nito, dhe specialistit të hedhjeve Vaso Selenica. E në këto kushte, kur dita e dytë do të bëhet në Elbasan, Partizani ka dominuar moshat e atletikës deri në 18 vjeç që në ditën e parë.

Kampionati Kombëtar

i Atletikës për Nën-18-vjeçarët

Rezultatet teknike të ditës së parë:

Meshkuj

Kërcim së larti           Renild Xhufi (Partizani)                  1.60 m

Hedhje disku                        Kristi Cepa (Skënderbeu)               33.62 m

Hedhje gjyle              Emiljano Myftari (Partizani)                        12.82 m

Hedhje shtize           Gentian Dyrmishi (Mj.Sportive)     38.14 m

Femra

Kërcim së larti           Tea Fetaj (Partizani)                        1.40 m

Hedhje disku                        Pamela Asllani (Partizani)             19.62 m

Hedhje gjyle              Pamela Asllani (Partizani)             7.51 m

Hedhje shtize           Marsela Luzi (Mj.Sportive)              21.10 m

Hedhje çekiçi                        Marsida Dani (Dinamo)                  32.30 m