ASNN – Federata Shqiptare e Atletikës në bashkëpunim me Bashkinë e Tiranës, kishin programuar që në fund të këtij viti të mbyllnin pistën e kërcimit së gjati dhe atij trehapësh pranë ish-Stadiumit Kombëtar “Qemal Stafa”, në zonën pranë “Juveniljes”. Sipas burimeve nga FSHA-ja, pista që do të shërbente për kërcimet së gjati dhe atë trehapësh, e projektuar me tartan dhe e planifikuar të ishte gati për fundviti, duket se është “peng” i motit.

Pasi shtrimi i tartanit kërkon një temperaturë të moderuar mbi 17 gradë celcius. Lagështira dhe temperaturat e ulëta nuk po e lejojnë përmbylljen e saj, por referuar qëndrimit të FSHA-së, pista do të mbyllet në momentin më të parë që do të krijohen kushtet e përshtatshme të motit. Megjithatë, duke pasur parasysh se jemi në dimër, ekzistojnë gjasat që pista të mos bëhet gati edhe për disa muaj të tjerë, gjë që do të dëmtonte objektivat e sportistëve të kërcimit së gjati dhe atij trehapësh.

Siç dihet, kushtet e atletikës në kryeqytet janë të mjerueshme, pasi mungon infrastruktura e përshtatshme. Dhe sportistët elitarë janë të detyruar të udhëtojnë çdo ditë drejt Elbasanit ose në pista të tjera të rretheve për të realizuar programin e tyre stërvitor. Për një atlet si Izmir Smajlaj, këto kushte janë jo vetëm të domosdoshme, por edhe përcaktuese për rezultatet e tij në garat ndërkombëtare. Fenomeni i kërcimit si gjati do të marrë pjesë në Evropianin e sallave të mbyllura.

Ky Evropian do të zhvillohet në Gllasgou dhe synon me patjetër medalje. Madje sipas trajnerit të tij, Gjergj Ruli, viti 2019 do të jetë viti i shpërthimit akoma më të madh të Izmir Smajlajt në rang ndërkombëtar. Por ai kujtoi për pushtetarët të zgjidhin “qesen” për atletikën, sepse buxheti i saj nuk mjafton as për t’u stërvitur normalisht.