Relaksa Dauti, kampionia dimërore në 800 metra dhe sportistja më e mirë e kampionatit të martën në Elbasan, është përshëndetur dhe nga Luiza Gega, e cila nëpërmjet profilit të saj në rrjetin social “Facebook”, ka pasur këtë mesazh urimi për talenten e re të atletikës shqiptare.

“Krenare për ty Laksi, – shkruan atletja e mirënjohur shqiptare në mesazhin e saj. – Je vetëm 14 vjeç dhe sot shpallesh sportistja më e mirë për të rritur në Kampionatin Individual Dimëror të Atletikës Shqiptare. Jam e sigurt që ke një karrierë të shkëlqyer përpara.”

“Ejj, je edhe me fat eee… që je më e përkëdhelura e ekipit dhe trajnerit. Do të doja shumë të isha aty me ju sot, por do të kemi aktivitete të përbashkëta plot. Nuk po zgjatem më”, – ka theksuar Luiza Gega, e cila ka sqaruar për të gjithë ata që nuk e dinë se me Relaksa Dautin janë kushërira të para.