Luiza Gega dhe Botërori i saj në sallat e mbyllura në Portland të Shteteve të Bashkuara të Amerikës ka qenë një shfaqje shumë e keqe. Rekordmenia e Ballkanit dhe e Shqipërisë në 1,500 metra në sallat e mbyllura me kohën 4’06”89 gati një muaj më parë, madje duke qenë edhe Kampione e Ballkanit, nuk ka mundur të dalë mbi gjendjen e saj gripale.

Që edhe pse e kishte lënë pas, teksa siç pat deklaruar trajneri i saj Taulant Stërmasi një ditë më parë në gazetën “Sport Ekspres” u shoqërua për tre ditë me temperaturë të lartë 39 e gjysëm, përsëri ka dhënë një gjendje dobësie për atleten. Pasoja është vendi i tetë në baterinë e dytë gjysmëfinale të Botërorit të Sallës me një kohë që duhen hapur blloqe shënimesh e gazetash për të parë se kur e ka bërë për herë të fundit atë.

4’16”12, që do të thotë gati 9”23 të qindtat larg atij rekordi që ka dhënë më 27 shkurt në Stamboll me kohën 4’06”89. Dhe në një farë mënyre, e kjo jo për fajin e saj, sepse në një farë mënyre sëmundjet e gjendjet virale për njerëzit janë, ka çuar dëm të gjithë përgatitjen 9-javore në Iten të Kenias. Sigurisht Luiza Gega mbetet dhe do të jetë imazhi më i mirë i atletikës shqiptare me të gjitha rekordet kombëtare që ka jo vetëm për salla të mbyllura, por dhe në pistë të hapur.

Por tashmë ndoshta duhet kërkuar dhe duhet gjetur një modul tjetër që në Kampionate Evropiane dhe Botërore, jo vetëm në salla të mbyllura, por dhe në pista të hapura të ketë një hap më shumë dhe të jetë gjithnjë pranë zonës së medaljes. Sepse bota vijon ta llogarisë me të gjitha kohët e saj nëpër mitingje ndërkombëtare, kampionate kombëtare dhe ballkanike, ta llogarisë si të tillë.

E djeshmja ishte një shfaqje e keqe dhe për t’u harruar, ndërsa tashmë pritet një tjetër Luizë në Kampionatin Evropian të Amsterdamit, si dhe në Lojërat Olimpike “Rio de Zhaneiro 2016”. Gjithnjë si sportistja e parë e kualifikuar me normë në Olimpiadë.

Kampionati Botëror i Atletikës

në Sallave të Mbyllura

“Portlend 2016”

Rezultatet teknike të baterisë së dytë

gjysmëfinale të 1,500 metrave femra

Nr.       Atletja / Kombësia                            Koha

1)       Sifan Hasan (Holandë)                  4’07”28

2)       Gudaf Tsegai (Etiopi)                      4’07”98

3)       Danuta Urbanik (Poloni)                4’09”41

4)       Melisa Dankan (Australi)                4’10”40

5)       Gabriele Steford (Kanada)             4’11”46

6)       Kori Mekgi (SHBA)                          4’11”62

7)       Klaudia Bobocea (Rumani)                       4’12”38

8)       LUIZA GEGA (SHQIPËRIA)           4’16”12

9)       Beata Nishimue (Ruanda)             4’19”39

10)      Tamara Armush (Jordani)              4’37”61