ASNN – Jusein Bolt ka treguar edhe një herë se mbetet “mbreti i padiskutueshëm” i garave të shpejtësisë, duke fituar finalen e 100 metrave për meshkuj në Kampionatin Botëror të Atletikës për Të Rritur, që po mbahet në kryeqytetin e Kinës, Pekin. Sikundër çdo veprimtari madhore sportive, edhe emocionet e kësaj gare u sollën për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar.
Ato janë vetëm 10 sekonda dhe vetëm 100 metra, por janë 10 sekonda dhe 100 metra hipqë e bëjnë të gjithë planetin të mbajë frymën e t’i ngulisë sytë në ekranet televizive. Pavarsisht se këtë radhë nuk e ka patur aspak të lehtë, Jusein Bolt ka treguar edhe një herë se mbetet “mbreti i padiskutueshëm” i garave të shpejtësisë, duke fituar finalen e 100 metrave për meshkuj në Kampionatin Botëror të Atletikës për Të Rritur, që po mbahet në kryeqytetin e Kinës, Pekin.
Në një finale historike, ku të 9 garuesit e kishin përshkuar distancën prej 100 metrash me kohë nën 10 sekonda, pritej një luftë e fortë dhe kështu ka ndodhur. Ka qenë amerikani Xhastin Gatlin, njeriu që kishte kohën më të mirë të vitit në këtë garë, ai që ka rrezikuar ta shkurorëzojë xhamajkanin. Megjithatë, Bolt e ka shmangur edhe këtë surprizë, duke dhënë maksimumin dhe duke fituar në fund me epërsi minimale, pasi vetëm një të qindtat e sekondës i kanë siguruar atij medaljen e artë në kurriz të amerikanit.
9.79 ka qenë koha e xhamajkanit, ndërsa 9.80 ka qenë ajo Gatlinit. Rivaliteti i kësaj gare u pasqyrua edhe në faktin se për vendin e tretë janë dhënë dy medalje, pasi amerikani Trejvon Bromell dhe kanadezi Andre De Gras mbërritën në finish me kohën e njëjtë. 9 sekonda e 92 të qindtat. Sikundër çdo veprimtari madhore sportive, edhe emocionet e kësaj gare u sollën për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar, nën komentin e veteranit të shquar të transmetimeve sportive, Vladimir Grillo, dhe specialistit të mirënjohur, Albert Karriqi.
