Izmir Smajlaj është “kampion” i Evropës, ndërsa Beogradi, për të dytën herë brenda një jave, ka kënduar shqip. “Kampion” i Ballkanit përpara një jave me 7.98 metra dhe tanimë kampion Evrope me 8.08, madje duke e thyer dy herë rekordin kombëtar në salla të mbyllura.

Dita dhe të gjithë shqiptarët kanë qenë për shkodranit, ndërsa për më tepër se sa treçerek ore, jo vetëm nëpërmjet internetit, por dhe pamjeve televizive direkt nga Beogradi nga rrjeti ndërkombëtar, “Eurosport”, por edhe fqinjët e “Rai Sport”, kanë qenë të përqendruar tek Izmiri.

Dhe shkodrani e ka shpërblyer në kërcimin e 6-të, ashtu sikurse ka bërë dhe në Beograd, madje duke pasur dhe luhatje, çka i ka bërë të ngrijnë të gjithë. Por forca, vitaliteti dhe shtatlartësia e ka ndihmuar këtë atlet që ta detyrojë kryeqytetin e Serbisë, Beogradin, të flasë sërish shqip.

Presidenti i Federatës Shqiptare të Atletikës, Gjergji Ruli, trajneri Vildan Tufi, dhe shefi i delegacionit, anëtari i kryesisë Oltion Luli janë mbi Izmir Smajlajn. Kampion Evrope, me dy rekorde kombëtare të thyera, dhe kjo nuk ka më mirë. Sepse janë përpara garat e verës, aq më tepër që është dhe Kampionati Botëror në Londër, atje ku pse jo dhe në kërcimin trehapësh të kemi një tjetër rekord prej tij.

Kampionati Evropian i Atletikës

në Salla të Mbyllura – Beograd 2017

Rezultatet teknike të kërcimit së gjati:

1)         IZMIR SMAJLAJ (SHQIPËRI)        8.08 M

2)         Mishel Torneus (Suedi)                  8.08 m

3)         Serhiy Nikiforov (Ukrainë)              8.07 m

4)         Tomash Jasczuk (Poloni)               7.98 m

5)         Julian Hovard (Gjermani)               7.97 m

6)         Lazar Aniç (Serbi)                            7.90 m

7)         Filipo Randaxo (Itali)                       7.77 m

8)         Elvis Misajns (Letoni)                      u skualifikua