ASNN – Atletika ka pak sportistë, por në gjirin e saj përfshihen edhe atletë të nivelit të lartë si Luiza Gega dhe Izmir Smajlaj, të cilët i kanë sjellë vendit medalje të shumta. Sportistët kane ende energji për të garuar me sukses në aktivitetet ndërkombëtare dhe Smajlaj mund të kthehet sërish me medalje nga Evropiani i Gllasgout në fillim të vitit 2019.
Së fundmi, ka befasuar me një deklaratë të tij presidenti i Federatës Shqiptare të Atletikës, njëherësh trajner i Izmir Smajlajt, Gjergj Ruli, i cili thotë se sportisti i tij është aq i shpejtë dhe i fortë, sa krahasohet me rekordmenin dhe fenomenin e atletikës botërore, Jusein Bolt.
Në një intervistë që dha për të përditshmen shqiptare, gazetën “SOT”, Ruli tha se Smajlaj ka një sprint të pabesueshëm që shkon në kufirin e 10 sekondave në 100 metra dhe mund të garojë si atlet i sprintit në 60 metër në garën e radhës në Evropian. “Në kushtet ku operojmë bëjmë një stërvitje me sakrifica të mëdha, – shprehet Ruli, – por ne na kanë hapur dyert njerëzit e thjeshtë.”
“Kanë arritur deri aty sa të na japin çelësat e palestrave, – ka vijuar kreu i organizmit që qeveris atletikën shqiptare. – Por na kuptoni, Izmir Smajlaj nuk po garon për badibilding, as për shtangist, atij i duhen pistat e përshtatshme për këtë garë, sepse kërkohen kërcimet si numër në javë, muaj e vit. Vetëm ne na ndodh të privohemi nga kushtet minimale.”
“Nëse kushtet do të ishin të mira, ne sot do të kishim në gjirin tonë një lider të atletikës botërore, – ka këmbëngulur Ruli. – Ndoshta mund t’u duket e tepruar kjo që do t’ju them, por Izmir Smajlaj ka sprint më të fuqishëm se Jusein Bolt. Kur unë e përmenda në fillim fare që ai do të dalë “kampion Europe”, më quajtën në rastin më të mirë euforik, e në rastin më të keq të çmendur.”
“Por unë nuk e kam mbyllur vlerësimin tim për të. Sepse Izmir Smajlaj është me potencial të atillë që mund të jetë lider botëror i këtij sporti dhe i atletikës në përgjithësi. Nëse shteti do të kthente sytë nga ky fenomen, ju siguroj që del “kampion bote”, ka përfunduar presidenti i Federatës Shqiptare të Atletikës, njëherësh trajner i Izmir Smajlajt, Gjergj Ruli.
