ASNN – Trajnerit Ardian Mema i dukej që larg sot buzëqeshja. Më në fund, trajneri bardheblu gjen fitoren e parë në krye të Tiranës, një fitore me goleadë, për të cilën aq shumë kishte pritur dhe ishte stërmunduar. Tirana mundi Kastriotin 4-0, duke i shkarkuar të gjitha “bateritë” në frontin sulmues, me qëllimin e vetëm për të marrë 3 pikët.
Dhe ia doli, teksa me 3-pikëshin e së shtunës, Tirana kapërceu Luftëtarin e u ngjit në vend të 7-të, me 14 pikë, duke dhënë sinjale shprese jo vetëm për mbijetesën, por edhe për t’u kthyer në garë me dinjitet. Formula e kampionatit dhe duelet e shumta direkte mundësojnë surpriza, sepse sezoni ka dhe 20 javë deri në fund, gjithçka është e mundur.
Ndeshja e së shtunës në Stadiumin “Selman Stërmasi” nuk la shumë vend për histori, megjithëse Kastrioti luajtur shumë mirë në minutat e para, duke dhënë idenë që mund të bënte surprizën. Por Tirana ishte përgatitur fort për të mos i lënë asgjë rastësisë dhe e zgjidhi ndeshjen mirë dhe me “festival” golash. Serinë e rrjetave bardheblu e hapi Edon Hasani, që realizoi me 11-metërsh në minutën e 11-të.
Në fundin e pjesës së parë ishte Bedri Greca që shënoi golin e dytë, duke i dhënë shpresë Tiranës për ta fituar ndeshjen. Në fakt, historia e ndeshjeve të fundit ka treguar se Tirana nuk arrin t’i mbajë epërsitë, sepse është përmbysur nga kundërshtarët. Por në këtë ndeshje bardheblutë kishin zënë mend. U shtrënguan fort edhe në pjesën e dytë, për të mos lëshuar pe.
Sepse Kastrioti tentoi të përsërisë atë që kishte bërë Partizani në derbi, por nuk ia doli dhe Tirana në minutën e 77-të i vu drejtim fitores me golin e Ngo’së. Në minutën e fundit ishte radha e Sentamusë për të shënuar golin e katërt dhe të fitores së thellë 4-0 të Tiranës.
Fjalët emocionuse të trajnerit Ardian Mema në fund të ndeshjes, që rezultati nuk ka nevojë për të kujtuar që Tirana e meritoi fitoren, ishin shumë domethënëse. Kjo fitore e nxjerr skuadrën 24-herë kampione nga kriza, të paktën përkohësisht, por edhe një qetësim i trajnerit, i cili e meritonte më fort se kushdo tjetër këtë rezultat sot.
Kategoria Superiore
Java e 16-të
Të premten, 7 dhjetor 2018:
Kukësi – Skënderbeu 1-0
Të shtunën, 8 dhjetor 2018:
Tirana – Kastrioti 4-0
Teuta – Partizani 1-1
Të dielën, 9 dhjetor 2018:
Kamza – Luftëtari (14:00)
Flamurtari – Laçi (17:00)
Renditja
Nr. Skuadra N. F. B. H. Gsh-Gp Pikë
- Partizani 16 11 2 3 18-8 35
- Skënderbeu 16 9 3 4 18-9 30
- Kukësi 16 9 3 4 16-9 30
- Teuta 16 8 5 3 19-12 29
- Laçi 15 7 5 3 13-10 26
- Flamurtari 15 6 4 5 13-11 22
- Tirana 16 3 5 8 17-19 14
- Luftëtari 15 4 1 10 11-17 13
- Kastrioti 16 3 1 12 11-29 10
- Kamza 15 2 3 10 7-19 9
