ASNN – Sikundër është mësuar dje, futbollisti i PSV Eind’hovenit dhe i përfaqësueses holandeze, Memfis Depej, do të jetë pjesë e Mançester Junajtid nga edicioni i ardhshëm.
Sipas asaj që kanë raportuar të enjten mediat angleze, kalimi i tij në skuadrën e udhëhequr nga trajneri dhe bashkatdhetari i tij, Luis van Gal, e ka vënë në dyshim të ardhmen e mesfushorit kosovar, Adnan Januzaj.
“Lojtari që mund të jetë më i shqetësuari nga transferimi i Depejit tek Mançester Junajtid është Adnan Januzaj, – shkruan faqja sportive espnfc.com. – Ky dyshim mbështetet në hapësirën e vogël që ka pasur këtë edicion Januzaj nën drejtimin e trajnerit Van Gal.”
“Januzaj nuk është më i aftë se Depeji në driblim dhe nuk është më i rrezikshëm në fazën sulmuese”, – vijon më tej faqja në fjalë. Mançester Junajtid e bleu Memfis Depejin nga PSV-ja për 27 milionë euro. Ai ka realizuar 21 gola në 28 ndeshje me ekipin holandez.
