ASNN – “Yjet e Ballkanit në sport”, Luiza Gega më e mira e Shqipërisë. Kristjan Asllani në vend të 21-të. Agjencia Bullgare Telegrafike (BTA), në bashkëpunim me agjencitë kombëtare të lajmeve në vendet e Ballkanit: Agerpres (Rumani), Anadolu Agency (Turqi), ANAMPA (Greqi), ATSH (Shqipëri), FENA (Bosnje dhe Hercegovinë), HINA (Kroaci), MPB (Maqedonia e Veriut), MINA (Mali i Zi) dhe Tanjug (Serbi), ka zhvilluar edicionin ne 50-të të sondazhit për sportistët më të mirë të vitit në Ballkan.
Në klasifikimin e yjeve të Ballkanit në sport morën vota gjithsej 57 sportistë, ndërsa pozicionimin më të lartë nga shqiptarët e kishte kampionia e atletikës, Luiza Gega, e cila u rendit në vend të 13-të më 12 pikë të grumbulluara. Gega zhvilloi një sezon të jashtëzakonshëm, duke vijuar paraqitjet në nivelin më të lartë për të disatin vit radhazi, me rezultate historike dhe rekorde të shumta. Për të kuptuar sezonin e pabesueshëm të Luiza Gegës, mjafton të përmendim vetëm disa nga arritjet e saj në 2023- shin.
Një vit në të cilin Luiza Gega bëri histori me tripletë medaljesh ari në Kampionatin Ballkanik që u mbajt në Serbi në disiplinat 3,000 metra, 5,000 metra dhe 3,000 metra me pengesa. Një tjetër medalje të artë e fitoi në Ballkanikun e krosit në Bullgari, si dhe në gjysmë-maratonën ballkanike që u mbajt në Maqedoninë e Veriut. Medalje ari atletja shqiptare regjistroi edhe në Kampionatin Evropian Ekipor në Poloni në garën e 5,000 metrave.
Në Poloni Luiza Gega bëri histori, duke fituar edhe medaljen e artë në Lojërat Olimpike Europiane në garën e 3000 metrave me pengesa, rezultat që erdhi me kohë rekord për kompeticionin. Përveç titujve të zakonshëm në rang kombëtar, Luiza fiksoi edhe rekorde të reja në 3000 metra me pengesa, 5 km rrugë, gjysmë-maratonë, apo rekord ballkanik, rezultate këto të stampuara gjatë vitit 2023 nga atletja shqiptare.
