ASNN – Bernard Berisha mund të largohet nga Skënderbeu pa nisur mirë sezoni, pasi tre klube nga Belgjika kërkojnë futbollistin e Skënderbeut. Anderlehti, Genku dhe Bryzhi po e ndjekin me vëmendje lojtarin me tipare sulmuese nga Kosova që ka luajtur shumë mirë deri tani në Ligën e Kampioneve.

Ata do të kenë vëzhguesit e tyre në ndeshjen ndaj Dinamos së Zagrebit në Elbasan, dhe Anderlehti duket më i favorizuar për ta marrë. Trajneri i ekipit më të shquar të Belgjikës, ish-kapiteni i kombëtares shqiptare, Besnik Hasi, mendon se Berisha do të ishte një përforcim shumë i mirë.

Ende nuk dihet nëse Skënderbeu do të binte dakord për ta lejuar futbollistin që të largohej, e ndoshta gjithçka do të varet nga shuma që do të ofrohet nga klubet belge. Nëse fitimi do të jetë i madh, presidenti Takaj dhe trajneri Josa mund të bien dakord, për t’i përdorur këto para për të bërë përforcime të domosdoshme në një edicion që do të jetë tepër i ngarkuar, në Shqipëri dhe në Evropë