ASNN – Kategoria Superiore e Kampionatit Kombëtare të Futbollit do të rikthehet këtë fundjavë për të nisur fazën e 3-të të sezonit 2023/2024. Përsa i përket ecurisë të dy fazave të para është bërë një analizë e detajuar dhe janë nxjerrë disa të dhëna interesante që kanë të bëjnë me fazën sulmuese dhe mbrojtëse. Egnatia është skuadra që ka bërë më mirë deri më tani në këtë edicion dhe ka krijuar një epërsi prej gati dy ndeshjesh ndaj kundërshtarit më të afërt në renditje, Partizani.
Megjithatë ky nuk është një tregues i drejtpërdrejtë, pasi në këtë sezon edhe pse skuadrat kanë hasur shumë pengesa, nga ana tjetër surprizat kanë qenë të shumta. Një nga arsyet kryesore që ndikon drejtpërdrejt në paraqitjen e ekipit është ndryshimi i trajnerit, pasi, si pasojë e kësaj, edhe skuadra ndryshon mënyrën e lojës. Pavarsisht se kryeson kampionatin, Egnatia nuk është skuadra që ka më shumë gjuajtje gjatë një ndeshjeje.
Partizani kryeson me 12.35, i ndjekur nga Dinamo me 11.65, por Egnatia është skuadra që ka përqindjen më të lartë të saktësisë përsa i përket gjuajtjeve drejt portës. Në 40% të rasteve rrogozhinasit kanë goditur portën. Dy sulmuesit e Egnatias, futbollistët e huaj Vysal Isgandarli (59%) dhe Gytis Paulauskas (52%) janë lojtarët që e ndihmojnë më shumë skuadrën, që ka regjistruar këtë statistikë të rëndësishme pas përfundimit të dy fazave të para.
Pas Egnatias, vijnë Tirana dhe Partizani me 37.8% të goditjeve drejt portës gjatë një ndeshje. Skënderbeu është skuadra që godet më pak me 8.9 goditje për ndeshje dhe ka përqindjen më të ulët të goditjeve në kuadrat 29.6%. Një në 3 goditje e dërgojnë në kuadrat Teuta dhe Vllaznia, që së bashku me Skënderbeun mbyllin renditjen me përqindjen më të ulët të goditjeve në portë. Në fazën mbrojtëse, skuadrat që kanë bërë më mirë në dy fazat e para të kampionatit janë Laçi dhe Vllaznia.
Ato kanë marrë përkatësisht 9.1 dhe 9.25 goditje drejt portës për ndeshje. Ndërsa dy skuadrat që pësojnë më shumë goditje drejt portës për ndeshje janë Kukësi me 14.18 goditje dhe Teuta me 12.13. Këto të dhëna mund të ndryshojnë sërish në dy fazat e mbetura të Kategorisë Superiore të Kampionatit Kombëtar të Futbollit dhe një ndikim shumë të madh do të ketë merkatoja dimërore.
