ASNN – Këtë të premte u zhvillua në Tiranë Krosi Kombëtar, organizuar nga Federata Shqiptare e Atletikës me pjesëmarrjen e pothuajse të gjithë sportistëve anëtarë të saj dhe në tërësi një pjesëmarrje e gjerë nga moshat e reja. Vendi i zhvillimit të krosit ishte zona e Liqenit në kryeqytet. Garat nuk dhuruan surpriza në kategorinë e të rriturve, pasi Luiza Gega për femrat dhe Ilir Këllezi për meshkujt janë pothuajse të pakonkurrueshëm dhe dominuesit absolutë të Krosit Kombëtar.
E veçanta e kësaj veprimtarie ishte se në të morën pjesë atletët më të mirë të vendit dhe kjo rriti jo vetëm interesimin por edhe rivalitetin. Garat ishin standarde: 4 km për kategorinë e të rejave, 6 km për kategorinë e të rinjve, 8 km për të rriturat dhe 10 km për të rriturit. Në kategorinë e të rinjve krosin e fitoi Onil Mazreku, kurse tek të reja korri sukses atletja me perspektivë Relaksa Dauti. Sa i përket fituesve tek të rriturit, Krosin Kombëtare e fitoi korçari Ilir Këllezi, tashmë fitues i përhershëm.
Sepse nuk ka lënë kros kombëtar dhe rajonal pa fituar këto vitet e fundit. Kurse tek femrat “diktaturën” e ka në dorë Luiza Gega, e cila nuk po u lë radhë të tjerëve të fitojnë ndonjë trofe. Dhe e bën këtë jo vetëm në pistë në 1500 dhe 3000 metra, por edhe në Krosin Kombëtar apo maratonat e ndryshme kombëtare. Në përgjithësi ishte një aktivitet me pjesëmarrje të kënaqshme, me rezultate të mira dhe premtuese, megjithëse kushtet e mirëfillta për garat atletike në Tiranë mungojnë, nuk ka pistë, një “gangrenë” të cilës nuk po i gjendet zgjidhja.
