Në intervistën e dhënë për “SOT” ditën e diel, mundësi dhe njëherësh trajneri i Tiranës, Sahit Prizreni, hodhi akuza të ashpra ndaj zyrtarëve të lartë të Komitetit Olimpik Kombëtar Shqiptar (KOKSH), duke e quajtur veprimtarinë e tyre një tentativë për t’i vënë flakën sportit në Shqipëri. Por, në kundërpërgjigje ndaj deklaratave të tij, kanë reaguar ashpër një pjesë e komunitetit të mundjes, pikërisht një grup trajnerësh, të cilët thonë se qëndrimi i Prizrenit është i padenjë dhe jashtë realitetit, madje duke e quajtur Prizrenin një “bukëshkalë”.

“Kemi dëgjuar fjalë 4 vitet e fundit nga ky sportist, që për ne është habi, por edhe për sportin shqiptar, pasi nxjerr shumë trajnerë që e paskan stërvitur, – thuhet ndër të tjera në qëndrimin e një grupi trajnerësh, midis të cilëve Burhan Arapi (Tirana); Roland Tusha (ish-trajner Tirana); Leonard Çakmashi (Inspektor K.S Tirana); Avni Hasa (Partizani); Altin Shtjefni (Lezhë), Joel Gjelaj (Lezhë), Saimir Loshi (Lezhë). – Mjafton të shihni buletinet, duke nisur nga mosha 13 vjeç e deri para 4 vitesh e në të gjitha ato do të lexoni emrin “Sahit Prizreni sportist e Viron Bezhani trajner”. Pra, një bukëshkalë, një mosmirënjohës të tillë zor se do të gjesh në gjithë botën.”

“Edhe sikur të kishte një gabim Viron Bezhani, ky njeri ka përfituar privilegjet nga më të ndryshmet, – vijon qëndrimi në fjalë. – Nuk mund të konceptojë dot askush në botë një sportist që mund të ketë të tilla privilegje. Për çdo sëmundje, shqetësim që ka patur Prizreni ne e dinim shumë mirë që Viron Bezhani bëhej copë. Ne jemi të bindur se ajo çfarë ka bërë Viron Bezhani për këtë sportist është e gabuar. Pse e themi këtë? Sepse çdo gjë Prizreni e përfitoi në mënyrë jo të rregullt. Shkollën apo trajtimet, të cilat i mori në mënyrë të veçantë e privatisht nga Viron Bezhani.”Edhe sot Sahiti kujton se i takonin ato privilegje, por nuk mund të trajtohej vetëm ai e të liheshin mënjanë të tjerët.”

“Një gabim i z.Bezhani, që vërtet e bëri sportist të mirë Sahit Prizrenin, por tani po shohim e kuptojmë se ka nxjerrë një rrugaç e mosmirënjohës, që nuk i shërben shoqërisë shqiptare dhe asaj sportive, – theksojnë trajnerët dhe zyrtarët në fjalë. – Ne i themi Viron Bezhani, “mirë të të bëhet”, sepse ju ishit një kuadër i përgatitur dhe duhej ta dinit mirë se për të bërë një sportist nuk mjaftojnë vetëm cilësitë sportive, por edhe edukative. Dhe këtë gjë ju nuk e bëtë, ndaj dhe këto pasoja sot duhet t’i vuani në kurriz. Ne mund të shkruajmë shumë për Sahit Prizrenin, privilegjet, shkeljet dhe paudhësitë e tij, por do të donim ta mbyllnim me kaq nëse do të na kuptonte. Shpresojmë që Sahiti të kuptojë se është në rrugë të gabuar, një vegël qorre dhe që nuk do të gjejë kurrë përkrahjen e njerëzve të shoqërisë.”