ASNN – Agjenti i sulmuesit brazilian të Barcelonës, Nejmar, ka mohuar spekulimet që e lidhnin brazilianin me një largim nga Barcelona drejt Mançester Junajtid. Gazeta britanike “The Sun” ka raportuar të premten në mbrëmje se 23-vjeçari ishte në bisedime sekrete me klubin anglez, por agjenti i tij i ka mohuar të shtunën këto lajme.
“Nuk ka asgjë. Ai ka tre vjet kontratë, – ka thënë Vagner Ribeiro. – Gazetat britanike janë spekulative. Barcelona asnjëherë nuk e ka menduar shitjen e Nejmarit dhe ai është i lumtur këtu.” Prej ditësh mediat britanike flasin për një interesim në rritje të Mançester Junajtid për brazilianin.
Por Barcelona nuk ka ndërmend ta shesë yllin e saj, të paktën jo tani që ai po jep maksimumin në radhët e katalanëve, duke pasur kontribut të konsiderueshëm në sukseset e ekipit. Megjithatë, deri në fund të gushtit, gjithçka mund të pritet, e për më tepër kur Mançester Junajtid po kërkon një lojtar goli.
