ASNN – Ish-futbollisti i njohur, Orjand Abazaj, i cili është një nga pjesëmarrësit e kursit të përgatitësit atletik, që ka nisur në fillim të muajit dhjetor, vlerëson iniciativën e Federatës Shqiptare të Futbollit dhe thekson se roli i përgatitësit atletik po bëhet gjithmonë e më i kërkuar në botën e futbollit. “Mendoj që kjo është një iniciativë shumë pozitive nga ana e Federatës, bota ka ecur në përgatitjen atletike dhe ky është një vlerësim shumë pozitiv”, – thotë ai.

“Mendoj që duhet t’i jepet shumë përparësi përgatitjes atletike dhe në strukturat edhe te të rinjtë, te moshat dhe të jetë një stërvitje graduale dhe të ketë një program, një periodizim të stërvitjes gjatë gjithë kohës dhe që të bëhet e mundur që edhe Shqipëria, jo vetëm në nivelin tekniko-taktik, por edhe në atë fizik, të ketë mundësi të nxjerrë elementë që të luajnë jashtë sa më shumë”, – ka vijuar ish-lojtari ndër të tjera i Tiranës, Kastriotit të Krujës, Shkumbinit të Peqinit and Partizani.

“Personalisht shpresoj që kjo të jetë edhe një mundësi tjetër për ne të këtij kursi, që të ecim përpara dhe t’i japim një shtytje tjetër përgatitjes fizike kudo në Shqipëri, – ka theksuar Abazaj. – Kursi është një nivel shumë i lartë. Ne jemi shumë të lumtur me këtë nismë. Profesorët që janë, përveçse kanë qenë trajnerë dhe preparatorë të ekipeve më me emër në Itali dhe në Europë, por është e mbështetur shumë edhe në kërkime shkencore.”

Në çdo skuadër futbolli shqiptare duhet të ketë sipas rregullores një përgatitës atletik në stafin e një skuadre, por edhe në stolin e saj teknik.