Ballshiotët nxjerrin jashtë loje Dinamon, Mehmeti dorëhiqet. Basriu dhe Dhrami kthehen në heronj, blutë e kanë inatin me të gjithë në Pezë-Helmës. Trajneri i bluve, pas kësaj disfate, ka kërkuar që të shikojë pozicionin e tij në krye të skuadrës

Dinamo – Bylis                                              1-2

Shënues: Imami 39’ / Basriu 13’, Dhrami 72’

Dinamo: Kotorri, Shazivari, Shkalla, Tafaj, Thana, Muça (Capa 68’), Ferraj, Imami, Arifaj, Allmuça (Rezi 73’), Turdiu. Trajner: D. Mehmeti

Bylisi: Kaloshi, Basriu, Xhafa, Shehaj (Dhrami 55’), Kuçi, Gjombrati, Sako, L. Muça, Gavazaj (Shoshi 80’), Liçaj (Metaj 74’), Hoxha. Trajner: R. Nenaj

Gjyqtarë: K. Kola, B. Mesi, E. Potomi (Tiranë)

Kartonë të verdhë: Tafaj, Thana (2), Turdiu / Sako, L. Muça, Basriu, Dhrami

Karton i kuq: Thana

Minutat e golave:

13’ Basriu, në një pozicion thuajse diagonal me portën dinamovite, ka gjuajtur beftë nga rreth 20 metra, topi është përplasur tek Imami e më pas ka përfunduar në krahun e djathtë të portierit Kotorri, i cili pavarësisht hedhjes së tij nuk e ka shmangur dot pësimin e golit. (0-1)

39’ Goditje dënimi për Dinamon në të majtë të sulmit blu, ka krosuar Ferraj, Imami ka kërcyer mbi mbrojtësit ballshiot dhe me kokë ka gjuajtur fort, ndërsa topi ka pushuar në rrjetë. (1-1)

72’ Dhrami i ka befasuar të gjithë dinamovitët me atë gjuajtje të fortë në ecje e sipër, në një largësi prej rreth 20 metrash, ndërsa topi ka pushuar pas shpinës së portierit Kotorri, në të djathtë të tij. (1-2)

Minutat e tjera:

8’ Shehaj ka gjuajtur në ecje e sipër, në një largësi prej rreth 20 metrash me portën dinamovite, por Kotorri ka pritur me qetësi.

16’ Ledian Muçaj e ka hedhur topin pas shpinës së mbrojtjes dinamovite, e ka marrë me zgjuarsi Hoxha, i cili ka gjuajtur fort, por sfera nuk i është bindur këmbëve të tij, teksa ka përfunduar në shtyllën e djathtë pingule e ka hyrë përsëri në lojë.

27’ Basriu kërkon përsëri të befasojë dinamovitët me një gjuajtje të fortë nga rreth 20 metra, por këtë herë Kotorri i ndodhur në pozicion ka pritur qetësisht.

31’ Hoxha godet në formë kthese nga rreth 20 metra largësi me portën dinamovite, por sfera është devijuar nga mbrojtja dinamovite dhe vetëm goditje këndi për miqtë.

53’ Goditje dënimi për Dinamon në krahun e majtë të sulmit blu, ka krosuar Ferraj, Imami ka tentuar të godasë me kthesë, por Kaloshi ka pritur.

64’ Gjonbrati ka gjuajtur fort në ecje e sipër, në një largësi prej rreth 20 metrash, por Kotorri ka grushtuar në korne, duke shmangur kështu pësimin e golit.

67’ Dhrami ka nxjerrë në pozicion shënimi Hoxhajn, i cili gjuan, por dinamovitët e kanë devijuar topin në goditje këndi duke larguar kështu rrezikun nga zona e tyre.

69’ Dhrami me atë gjuajtje të fortë në ecje e sipër, në një largësi prej rreth 20 metrash, ka paralajmëruar golin e dytë të ballshiotëve, por këtë herë është ndalur nga pritja e Kotorrit.

86’ Pas krosimit nga këndi në të djathtë të sulmit dinamovit, Rezi ka gjuajtur me kokë, por Basriu e ka larguar topin tek vija “fatale” e portës. Edhe një herë tjetër harkim nga këndi në të majtë të sulmi blu, godet Arifaj me kokë, por pret Kaloshi.