ASNN – Pogradeci e vlerësoi takimin me Butrintin duke bërë një hap të sigurt drejt ngjitjes në vendet e para të renditjes në ditën e parë të pjesës së dytë të kampionatit. Liqenorët e menaxhuan mjaft mirë lojën, fituan me një lojë bindëse, duke e vendosur rezultatin në pjesë e parë, atje ku qendërmbrojtësi Bufasi i dhuroi shokëve të tij një trepikësh me vlerë. Pjesa e parë ka parë një fillim të shpejtë për vendësit, atje ku Alillari depërton bukur në zonë, por asnjë nga shokët e vet nuk ishte i gatshëm ta çonte topin në rrjetë. Miqtë tentojnë me anën e Aleksit, por Miraka është në gatishmëri.
Loja në minutat në vazhdim përqendrohet në mesin e fushës, ndërsa të dy ekipet bëjnë përpjekje për të shënuar. Është minuta e 11-të kur Topllari gjuan në drejtim të portës mike, por pret Haxho. Minuta e 20-të dhe janë dy aksione të vendësve, por pa mundur që të shënojë. Janë minuta që flasin për liqenorët, të cilët ushtrojnë presion, por gabojnë në finalizim. Megjithatë Alillari është pranë golit. Vendësit preferojnë që të sulmojnë nga krahët dhe në një goditje dënimi në afërsi të zonës Bufasi shtatlartë shënon me kokë. Pak çaste më vonë, Miraka shpëton portën e tij për mrekulli, duke devijuar gjuajtjen e Muços.
Në pjesën e dytë, vendësit vihen në zotërim të lojës, atje ku me pasime të shkurtra mundohen që të arrijnë tek porta e Haxhos, ndërsa miqtë vihen në kërkim të golit të barazimit. Pas minutës së 53-të liqenorët shpërngulen në gjysmëfushën mike duke rrezikuar me anë të Topllarit, Purës, Pengut. Minuta e 59-të, Miraka shmang gjuajtjen e Muçës në zonë dhe në kundërsulm liqenorët fitojnë një goditje dënimi, por Rapo gjuan jashtë katërkëndëshit. Topllari një minutë më vonë gjuan fort, por topi devijohet. Fundi i takimit flet për vendësit, por duket se dy ekipet u pajtuan me rezultatin e minutës 40-të, atëherë kur Bufasi e kaloi ekipin e tij në fitore.
Pogradeci – Butrinti 1-0
Shënues: Bufasi 40’
Pogradeci: Miraka, Pere, Bufasi, Hysenllari, Çerepi (Berberi 68’), Topllari, Shyti, Pura, Pengu, Alillari (Binishi 75’), Rapo (Zeqollari 79’). Trajner: A. Abazaj
Butrinti: Haxho, Xhuvani, Xhibro (Barka 67’), Alzeneli, Aleksi, Meçani, Hepaj, Muço, Rapa, Papa, Nela (Dorti 49’). Trajner M. Hysi
Gjyqtarë: I. Myrtja, M. Dervishi, S. Zeka (Shkodër)
Kartonë të verdhë: Shyti, Topllari, Çerepi, Pengu / Xhibro, Xhuvani, Dorti
