ASNN – Një miqësore në tentativë. Kështu mund të cilësohet ideja e hedhur të shtunën nga mediat italiane, të cilat shkruajnë se përfaqësuesja “axurre” është në kërkim të një ndeshje miqësore më 18 nëntor të këtij viti. Prestigjiozja italiane “La Gazzetta dello Sport” shkruan se “trajneri i ri i Italisë, Antonio Konte, është duke menduar që të planifikojë një miqësore në nëntor, edhe pse nuk është një datë e vënë në dispozicion nga FIFA për të tilla ndeshje.
Fitorja në fushën e Portugalisë i ka dhënë zemër e besim kombëtares shqiptare të futbollit, por njëkohësisht e ka rivlerësuar pozitivisht në sytë e të tjerëve. Prestigjiozja italiane “La Gazzetta dello Sport” shkruan se përfaqësuesja “axurre”, e drejtuar nga Antonio Konte është drejt zyrtarizimit të një ndeshjeje miqësore me Shqipërinë më 18 nëntor, çka dëshmon se fqinjët tanë të përtej Adriatikut na vlerësojnë si një kundërshtar potencial për të testuar veten.
Mediat italiane shkruajnë në lidhje me këtë lajm, që ende nuk është zyrtarizuar “trajneri i ri i Italisë është duke menduar që të planifikojë një miqësore në nëntor, edhe pse nuk është një datë e vënë në dispozicion nga FIFA për të tilla ndeshje”. Sipas “La Gazzetta dello Sport”, ka një negocim të vazhdueshëm me Shqipërinë, e cila për më tepër ka një trajner italian, Xhovani De Biazi. Negociatat janë në zhvillim dhe ndoshta miqësorja mund të luhet në Itali.
Por, në qoftë se marrëveshja me shqiptarët nuk do të arrihet, Federata Italiane e Futbollit do të trokasë në derën e Kolumbisë për një sfidë miqësore në fushë neutrale (në Zvicër apo në Londër, për shembull). Gjithsesi, nuk është e lehtë për të organizuar një ndeshje të tillë, për shkak se Antonio Konte, i cili nuk dëshiron shpërqendrim në funksion të ndeshjes kundër Kroacisë, e vlefshme për eliminatoret e Kampionatit Evropian, preferon që kjo miqësore të caktohet pas këtij angazhimi, domethënë, më 18 nëntor.
