ASNN – Krerët e Ligës Ballkanike të Basketbollit (BIBL) janë pritur në nga kryetari i FBK-së, Erolld Belegu dhe Sekretari i Përgjithshëm, Leart Hoxha. Në takim me drejtorin sportiv të kësaj lige, Shej Shtriks dhe drejtoreshën e marketingut të ligës Lubomira Shtriks, krerët e FBK-së kanë biseduar për pjesëmarrjen e ekipeve kosovare në ligën BIBL dhe mundësitë e thellimit të bashkëpunimit të ndërsjellë.
Drejtuesit e ligës BIBL përsëritën se FBK-ja dhe ekipet nga Kosova janë pjesë shumë e rëndësishme e kësaj lige dhe do të punohet që gjërat të mbesin kështu edhe në të ardhmen. Sezonin e ardhshëm sërish pritet të jenë dy ekipe të Kosovës që garojnë në këtë ligë. Në takim u fol edhe për përkrahjen konkrete që liga BIBL dhe drejtuesit e saj mund të japin për gjyqtarët kosovarë.
Dhe palët u pajtuan me idenë që FBK-ja të ketë mundësi të shfrytëzojë kapacitetin e ligës BIBL për gjyqtarë dhe analizë të gjykimit, si dhe forma tjera të përkrahjes me qëllim të përmirësimit të cilësisë së referimit në Kosovë.
