Federata Shqiptare e Taekuondo në versionin ITF, ashtu siç kishte paralajmëruar dhe më parë, ka bërë përzgjedhjen e ekipit kombëtar, që do të marrë pjesë në Kampionatin Evropian, i cili zhvillohet në Moldavi, si dhe në Kampionatin Botëror që do të bëhet në Argjentinë. Në këtë zgjedhje të ekipit kombëtar kanë marrë pjesë 12 kandidatë, prej të cilëve janë zgjedhur nëntë sportistë, dy prej të cilëve femra.

Dhe lista e të përzgjedhurve është: Të rinj (Manuel Gaxhja Elbasan), Donian Zhapaj (Fier), Të reja (Elefteria Papadhopuli Vlorë, Sara Pushaj Tiranë), Të rritur (Ani Fekollari Tirana, Xhekson Titini Tiranë, Jozef Hila Shkodër, Dorian Potka Korçë, Muhamet Pushaj Tiranë). Dhe këto kandidatura janë zgjedhur nga Komisioni Teknik dhe ai gjykues i përbërë nga: Bujar Çaushi (Brezi i zi 6 dan, Drejtori Teknik i Federatës), Ardjan Çaushi (Brezi i zi 4 dan), Emiljan Kuka (Brezi i zi, 4 dan), Andon Papajorgjiu (Brezi i zi, 3 dan), Taulant Buzi (Brezi i Zi 2 dan) dhe Artan Prenga (Brezi i Zi 1 dan).

Ndërkohë përpara zgjedhjes së ekipit kombëtar, drejtori teknik i Federatës Shqiptare të Taekuondosë ITF, Bujar Çaushi, do të deklaronte: “Sot kemi të pranishëm përfaqësues të Divjakës, Lushnjës, Durrësit, Roskovecit, Vlorës, Vorës, Shkodrës, Korçës. Mungon përfaqësuesi i Kuçovës kjo për arsye dëmtimi. Por gjithsesi taekuondoja shqiptare mund të bëhet e fortë dhe të zhvillohet me pikat e saj të referimit.”

“Që do të thotë se një pikë në Shkodër do të përgjigjet për të gjithë Veriu, – ka vijuar ai. -Në Lindje do të kemi atë të Korçës, Gjirokastra do të jetë për Jugun dhe po kështu dhe Fieri. Ne duam ato personazhe që e duan sportin dhe duhet të jemi si një familje e madhe. Këtu duhet të vijë ajka e të gjithë sportistëve tanë, ndërsa do të përzgjidhen 20 sportistë, të cilët do të marrin pjesë në shumë aktivitete ndërkombëtare. Ajo që më duhet të them është se ju duhet të ecni përpara.”