ASNN – Teksa është ende në pritje të përgjigjes së testit B të antidopingut për sportistin peqinas, Daniel Godelli, peshëngritja shqiptare përballet me dënime të rënda, fillimisht financiare, e më pas sportive. Nëse edhe Godelli do të rezultojë pozitiv edhe në testin B, sikundër ka ndodhur më parë edhe me Romela Begajn, dhe, së fundmi, me Hysen Pulakun, Shqipëria rrezikon fillimisht një gjobë të majme e më pas edhe pezullimin nga veprimtaritë ndërkombëtare.
Peshëngritja shqiptare përballet me ndëshkime të rënda nëse edhe Daniel Godelli rezultaton pozitiv në testin B të antidopingut, por më tepër se kaq, Shqipëria rrezikon të shkojë në Lojërat e ardhshme Olimpike me numrin më të vogël të sportistëve në këto dy dhjetëvjeçarët e fundit. Pas Romela Begajt, edhe testi B i Hysen Pulakut, që është bërë të martën në laboratorin e antidopingut në Këln të Gjermanisë, ka dalë pozitiv. Teksa është ende në pritje të përgjigjes së testit B të antidopingut për sportistin peqinas, Daniel Godelli, peshëngritja shqiptare përballet kështu me një të ardhme të zymtë.
Nëse edhe Godelli do të rezultojë pozitiv edhe në testin B, sikundër ka ndodhur më parë edhe me Romela Begajn, dhe, së fundmi, me Hysen Pulakun, Shqipëria rrezikon fillimisht një gjobë të majme e më pas edhe pezullimin nga veprimtaritë ndërkombëtare. Bëhet fjalë për një gjobë individuale prej 5,000 Eurosh për person, çka do të thotë 20,000 Euro për 4 sportistë, përfshi këtu edhe Arbër Çerçizin që doli pozitiv më herët në 2014-tën, por edhe për 100,000 Euro si Federatë.
Dhe derisa të shlyhen këto detyrime, Shqipëria do të pezullohet përkohësisht, por kjo do të nënkuptojë se mund të humbasë pjesëmarrjen si në Evropianin e këtij viti, që do të mbahet në Gjeorgji, ashtu edhe në Botërorin e fundvitit. Duke humbur këto dy veprimtari, Shqipërisë i ulen ndjeshëm gjasat për të kualifikuar disa sportistë në Lojërat e ardhshme Olimpike, ato të Rio Zhaneiros vitin e ardhshëm, pasi peshëngritja ka qenë sporti që ka kualifikuar më tepër sportistë.
