Sektori i ekipeve kombëtare në Federatën Shqiptare të Futbollit ka gjithçka gati në lidhje me seleksionimet e grupmoshave të caktuara për përfaqësueset. Dje në faqen zyrtare në Internet të Federatës Shqiptare të Futbollit www.fshf.org është bërë publik edhe grafiku me anë të të cilit do të ndiqet ky seleksionim për datëlindjet 1997 dhe datëlindjen 1999.
Grafiku ka të përcaktuar qartë moshën, datat dhe zonat, që do të seleksionohen gjatë muajit janar. Këto seleksionime do të zhvillohen në Qendrën e Ekipeve Kombëtare në Kamëz. Komisioni seleksionues do të përbëhet nga Bujar Kasmi, Paolo Tramexani, Skënder Gega, Altin Lala, Xhemal Mustedanagic dhe Redi Jupi. Në të gjitha ditët e përcaktuara nga ky grafik, seleksionimet do të fillojnë në orën 10.00.
Për datëlindjen 1999 plani i seleksionimeve është ky: më 19 janar zona e Tiranës dhe Durrësit, më 20 janar zona e Fierit dhe Korçës, më 21 janar zona e Shkodrës dhe Elbasanit dhe më 22 janar zona e Kosovës. Për grupmoshën 1997 plani i seleksionimeve është ky: më 26 janar zona e Tiranës dhe Durrësit, më 27 janar zona e Fierit dhe Korçës, më 28 janar zona e Shkodrës dhe Elbasanit dhe më 29 janar Kosova.
