ASNN – Një kurs që ka për synim testimin e 24 trajnerëve, ku në plan të parë do të jetë atletika në shkolla, apo dhe në nivelin e fëmijëve, po zhvillohet në Tiranë nën drejtimin e dy instruktorëve ndërkombëtarë. Trajnerët pjesëmarrës të këtij kursi do të pajisen me certifikatën e nivelit të parë të Federatës Botërore të Atletikës, e cila është e njohur ndërkombëtarisht.

Dy instruktorë të certifikuar ndërkombëtarë, slloveni Bostian Bradeshko dhe boshnjakja Vahida Koziç, po zhvillojnë në Tiranë një kurs 9-ditor për trajnerët e atletikës, por edhe mësuesit e edukimit fizik. Duke folur për AlbanianSport.com, dy specialistët kanë vlerësuar përkushtimin e trajnerëve shqiptarë, si dhe numrin e lartë të trajnereve dhe mësueseve femra.

“Ky kurs ka për synim testimin e 24 trajnerëve, ku në plan të parë do të jetë atletika në shkolla, apo dhe në nivelin e fëmijëve, – ka theksuar slloveni Bradeshko, duke folur në mjediset e Universitetit të Sporteve në kryeqytet, ku po zhvillohet aspekti praktik i këtij kursi. – Trajnerët pjesëmarrës të këtij kursi do të pajisen me certifikatën e nivelit të parë të Federatës Botërore të Atletikës, e cila është e njohur ndërkombëtarisht.”

“Më ka bërë përshtypje më tepër numri i trajnereve, por edhe mësueseve femra dhe e vlerësoj këtë si një ogur të mirë, – ka deklaruar nga ana tjetër Koziçi. – Ky është një program pozitiv për zhvillimin e fëmijëve në shkolla.” Këtë kurs e kanë vlerësuar edhe Drejtori i Sporteve në Ministrinë e Arsimit dhe Sportit, Vladimir Gjonaj, si dhe Presidenti i Federatës Shqiptare të Atletikës, Gjergj Ruli. Ky kurs përfundon më 12 janar.