ASNN – Në atë që ishte padyshim lajmi më i bujshëm i këtyre dy ditëve të para të 2015-tës, kapiteni i Liverpulit, Stivën Xherrard, ka konfirmuar se do të largohet në fund të sezonit nga klubi për të cilin ka luajtur 695 ndeshje përgjatë 16 viteve të fundit.
Një nga ikonat e futbollit anglez të dy dhjetëvjeçarëve të fundit, Stivën Xherrard, ka bërë të ditur të se në fund të sezonit do të largohet nga klubi i Liverpulit, ndërsa destinacioni i mundshëm i tij pritet të jetë përtej Atlantikut, në Shtetet e Bashkuara të Amerikës.
Kapiteni i klubit të njohur anglez, të mbiquajtur, “Të kuqtë”, e ka cilësuar si më të vështirin e jetës së tij vendimin për të ulur siparin e një karriere 16-vjeçare me klubin anglez, për të cilin ka luajtur 695 ndeshje dhe ka shënuar 180 gola.
Sipas tij, në përfundim të këtij sezoni, atëherë kur i mbaron edhe kontrata aktuale, ai nuk do të luajë kurrë ndaj Liverpulit, çka nënkupton se Xherrard nuk do ta vazhdojë karrierën për ndonjë klub tjetër të Premier Ligës Angleze.
I lindur në një fshat të zonës së Mërsisajdit, Stivën Xherrard iu bashkua akademisë së klubit të Liverpulit që në moshën 9-vjeçare, ndërsa 9 vjet më vonë, në nëntor të 1998-s, ka debutuar me ekipin e parë të “Të kuqve”, në ndeshjen kundër Blekbërn Rovers.
Me Liverpulin, Xherrard ka fituar Ligën e Kampioneve, Kupën UEFA, dy herë Kupën e Anglisë, 3 herë Kupën e Ligës Angleze, një herë Superkupën e Anglisë, dy herë Superkupën e Evropës, si dhe ka luajtur 114 herë me fanellën e përfaqësueses angleze.
