ASNN – Me rastin e festës të Krishtlindjes, Korabi, edhe sepse është kryesuese e denjë e grupit të Veriut të Kategorisë së Dytë, është mbuluar nga urimet dhe falënderimet. Pikërisht në faqen e “Facebook”-ut, KS Korabi, tifozët kanë shprehur të gjithë falënderimin e tyre për grupin e lojtarëve, trajnerëve dhe presidentin Fehmi Mziu, të cilët bashkë po bëjnë të mundur ëndrrën e kahershme të dibranëve për të qenë një kategori më lart.

Pse jo, sipas tyre, pas dy sezonesh në Kategorinë Superiore. Gjithsesi ja dhe falënderimi i tifozëve dibranë për të gjithë skuadrën e Korabit. “Faleminderit çuna për gjithçka që keni dhënë deri më tani, faleminderit të gjithë stafit drejtues duke filluar nga presidenti ynë Fehmi Mziu e të gjithë të tjerët me radhë”, – kanë shkruar dibranët.

“Faleminderit për dinjitetin që i keni kthyer dibranëve, sepse falë punë tuaj ato shkallë të stadiumit janë plot dhe do të vazhdojnë të jenë të tilla gjithmonë. E të gjithë bashkë të bëjmë të mundur ngjitjen e Korabit në Kategorinë e Parë”, – ka përfunduar urimi i tifozëve dibranë për skuadrën e tyre të zemrës në faqen e “Facebook”-ut, KS Korabi.