Kur në pranverën e dy viteve më parë, në Kampionatin kombëtar të boksit në Kavajë për moshat 15-16 vjeç, pas ceremonisë përmbyllëse, një meso-burrë me trup atleti, më shfaqi dëshirën që të shkruaja për boksierin Jurgen Uldedaj, ngaqë ishte i bindur se djali i tij kishte prirje për sportin e nisur, kam refuzuar. “Kam hequr dorë nga të shkruarit në shtypin sportiv”, ja ktheva dhe më pas me një buzëqeshje, me mëdyshjen e ambicies prindërore për të përligjur në rreshta entuziazmin të djalit të porsashpallur kampion në kategorinë e rëndë, u largova.
Miqtë ma dinë dobësinë për talentet e reja të ringut dhe duke parë Jurgenin në ring kujtoj veten, ndërsa përveç medaljes së kampionit u vlerësua dhe si boksieri më i mirë i aktivitetit, së bashku dhe me Rexhildo Zenelin. Në fakt, Jurgeni nuk arriti të më bindi për klas boksimi nga që të dy rivalët e tij u tërhoqën para kohe. Një vit më vonë sërish kampion kombëtar për moshat 17-18 vjeç duke u cilësuar denjësisht si boksieri më i mirë. Mjeshtërisë së boksimit bashkëkohor iu shtua më vonë dhe medalja e bronztë në Kampionatin Evropian për këtë moshë të zhvilluar në Rusi.
E kam përgëzuar Jurgenin duke e cilësuar si boksieri i së ardhmes. Ringut shqiptar gjatë udhëtimit të tij asnjëherë nuk i kanë munguar boksierët e spikatur. Në këtë rast i jap të drejtë boksierit të mirënjohur Luan Krasniqi, i cili e ka cilësuar boksin si sporti burrëror i shqiptarëve për cilësitë dhe dhuntitë psiko-fizike që kërkon. Vetë Luani e ka dëshmuar me bindje këtë në karrierën e shkëlqyer të boksimit amator e më tepër në atë profesionist. Jurgen Uldedaj me shokë si 17-vjeçar është kthyer në një makinë të përsosur e solide e krijuar nga natyra dhe Zoti.
Gjithnjë për të na dhuruar emocione të forta në ringjet e vendit dhe ato ndërkombëtare. Me bindje e pohoj se Jurgeni e tejkalon grintën e një boksieri amator. Është e qartë se talenti i tij natyror tashmë i plotësuar ia rrit vlerat mjeshtërore nga ndeshja në ndeshje veçanërisht në ato ndërkombëtare. Së fundmi është nder të jesh trajner i Jurgen Uldedajt që me mund e përvojë ja jap në procesin stërvitor dhe ai ta shpërblen në ring. Dhe shembulli konkret është dhe medalja e Artë në turneun e 17-18 vjeçarëve në Baku. Ndaj s’më mbetet gjë tjetër veçse t’i uroj Jurgen Uldedajt, por dhe trajnerit të tij Sead Bushati, një vit të mbarë dhe sa më shumë medalje.
* Mjeshtër i Madh
