Mustafa Tukseferi është njeriu që dha gjithçka për sportin. Hyn në listën e atyre shefave të klubit, të paktën në kryeqytet, që i kanë mbajtur gjallë dhe lart klubet shumësportëshe e jo vetëm kaq. Për karrierën e tij të gjatë është në nivelet e larta të Dinamos së Sokol Morinës dhe Partizanit të Isa Tares. Ndaj dhe dje, teksa kishte 65-vjetorin e lindjes, i ka mbledhur të gjithë miqtë e tij në hollin e Agjencisë së Shërbimit të Sporteve për të bërë lamtumirën me punën zyrtarisht. Por jo ama me kontributin e tij për sportin, sepse është figurë që të paktën në anën organizative mbetet një shembull absolut.
Për gjithçka që ka dhënë, Komiteti Olimpik Kombëtar Shqiptar dhe Agjencia e Shërbimit të Sporteve i kanë bërë një ceremoni për t’u mbajtur mend gjatë, atje ku nuk kanë munguar dhe vlerësimet nga të gjithë. Që nga nxënësit e tij Agim Reka dhe Ilo Koja, ish-volejbollistë të Tiranës dhe trajner, e deri tek Artan Pogoni, Stavri Bello, Vangjel Koja, Ajet Toska, Isa Tare, Roland Avrami, Vladimir Gjonaj, Luan Zhegu, Ylli Tomori e Lluka Heqimi kanë vlerësuar dhe kanë ngritur lart figurën e Mustafa Tukseferit. Madje Bashkia e Tiranës, nëpërmjet drejtorit të sportit e të rinisë, Artan Pogoni, ka dorëzuar titullin “Mirënjohje” për Tukseferin e madh.
Jo vetëm kaq, tufa me lule nga Toska e Tare, por dhe një dhuratë e veçantë nga Ministria e Arsimit dhe e Sportit dorëzuar nga Drejtori i Sporteve, Vladimir Gjonaj. E më pas një ekspozitë fotografike ka pasqyruar punën e Tukseferit në të gjitha nivelet e sportit shqiptar. Më parë Mustafa Tukseferi ka ushtruar basketbollin tek Dinamo e Apolonia, hendbollin tek Dinamo, duke u shpallur kampion kombëtar, si dhe atlet me Tiranën. Mësues i edukimi fizik që më 1968 në Fier, për të kaluar më pas në shkollat 8-vjeçare dhe të mesme të kryeqytetit, që nga ajo e gjuhëve të huaja e deri tek “Sami Frashëri”.
Tukseferi ka qenë ndër ata që ka mbajtur klasat sportive të profilit të volejbollit. Por në klubit Tirana do të ishte zëvendës-shef, për t’u bërë më pas nga 1991-2000 shef i klubit shumësporteve bardheblu. Shumë trofe, por dhe rezultate mbresëlënëse në arenën ndërkombëtare me Tiranën në të gjitha disiplinat sportive. Nga 2000 e deri më 2014-ën pjesë Agjencisë së Shërbimit të Sporteve si koordinator i Federatave. Organizimi i tij është i dukshëm në Kampionatet Evropiane të Mundjes, në Evropianin e Peshëngritjes më 2008-tën në Durrës dhe më 2013-tën në Tiranë, në kampionatet ballkanike të të rejave dhe paratërejave në Tiranë, apo dhe në Kupën e Mesdheut në not.
Pjesë e komiteteve drejtuese në Atletikë e Volejboll, por dhe në Komitetin Olimpik Kombëtar Shqiptar, ndërsa ka qenë kryetar i Komisionit Teknik. Shumë diploma e medalje në karrierën e tij për të gjitha arritje. E për të gjitha këto, miqtë e tij, sekretarë e president federatash, por dhe gazetarë i kanë uruar: Mos u plaksh kurrë dhe sa më shumë në aktivitet.
