Tirana e ka pasur ndeshjen nën kontroll të paktën deri në pjesën e katërt. Ka fituar të parën 24-19. Më pas shkohet pikë më pikë, ndërsa e dyta është fituar me vështirësi nga bardheblutë 22-21 dhe në pushim bardheblutë e Shehut kanë kryesuar me 6 pikë diferencë. Dhe kur në fund të pjesës së tretë, që është fituar përsëri nga Tirana, 23-17, bardheblutë kryesonin me 11 pikë, atëherë të gjithë kanë nisur të mendojnë se gjërat morën fund.
Por Kamza Basket, sidomos me goditjet e trepikëshave, atje ku janë dalluar Karaj e më pas Ndreko (një basketbollist që ka dalë në fakt nga të rinjtë e Tiranës, por që me shumë zgjuarsi dhe durim Kamza Basket është duke e bërë lojtar i dobishëm. Aq sa nuk kanë munguar as vlerësimet për të drejtuesve të Vllaznisë, veçanërisht të drejtorit teknik të kuqebluve, Astrit Zaganjori), di të gjuajë në mënyrë të beftë. Jo vetëm barazon, por dhe arrin të dalë në avantazh 79-82, 82-85 dhe në fund 84-87.
Dhe kur kamzalinjtë e kanë fituar pjesën e katërt thellësisht 15-29, që do të thotë me 14 pikë diferencë, atëherë do të thotë që tek Tirana gjërat nuk kanë funksionuar si duhet. Ndoshta starti i lojës pa Laskun e Janin dhe futja e tyre me vonesë ka prishur dhe strukturën e atij formacioni të mirë të bardhebluve. Pa thënë që duhej në fushë edhe një qendër si Hasani, sepse jo pak Daliu ka qenë i saktë poshtë koshit të Tiranës.
Dhe për të tilla gjëra, pa thënë që i ftohti duke se ka ndikuar dhe në saktësinë e gjuajtjeve të bardhebluve, Kamza Basket sot është finale me ëndrrën e madhe që të përsëris atë që ka bërë në janar të këtij viti, teksa pat mundur Vllazninë në finalen e Superkupës, 90-81. Pritet një ballafaqim i fortë, që do të ketë dëshirën e madhe të Kamza Basket për t’u bërë për herë të dytë fituese e Superkupës.
Tirana – Kamza Basket 84-87
(24-19, 22-21, 23-17, 15-29)
Tirana: Vogli (9), Gjyzeli (10), Gjonaj (32), Haxhiu (2), Vaqarri (16) / Jani (9), Lasku (4), Lilaj (2), Emanuel. Trajner: B. Shehu
Kamza Basket: Daliu (25), Birçaj (4), Karaj (24), Shestani (15), Muhametaj (2) / Qehajaj (4), Gjoka (3), Ndreko (10), Hoxha. Trajner: A. Muhametaj
Gjyqtarë: G. Cici (Tiranë), M. Kasëmi (Vlorë), G. Basho (Shkodër)
Kupa e Shqipërisë
Basketboll – Meshkuj
Gjysmëfinalet
Të premten:
Vllaznia – Partizani 67-54
(15-13, 16-10, 19-16, 17-19)
Tirana – Kamza Basket 84-87
(24-19, 22-21, 23-17, 15-29)
Finalja
Të shtunën:
Vllaznia – Kamza Basket (18:00)
