ASNN – Miqësoret e moshave, Shqipëria e Nën-17-vjeçarëve fiton 3-2 me përmbysje ndaj Polonisë, vendosin golat e Kullës & Voglit. Kështu, Kombëtarja kuqezi e Nën-17-vjeçarëve e fitoi të premten ndeshjen e parë miqësore ndaj Polonisë, të luajtur në fushat e “Shtëpisë së Futbollit”, siç njihet ndryshe selia e Federatës Shqiptare të Futbollit në kryeqytet.
Kuqezinjtë triumfuan 3-2, në një takim spektakolar që u vendos nga dy golat e Gabriel Kullës dhe një i Serxhio Voglit. Trajneri kuqezi, Andrea Tedesko e nisi me këtë formacion titullar ndeshjen ndaj Polonisë së Nën-17-vjeçarëve: Rafaele Huli (portier), Darli Kurti, Kris Gecaj (kapiten), Andreas Llana, Lucas Çekrezi, Fabjano Nuhaj, Rikardo Sheji, Ernesto Marqeshi, Gariel Kulla, Alen Vukaj dhe Arman Durmisi.
Në fakt, në “Shtëpinë e Futbollit” u zhvillua një ndeshje e luftuar dhe në pjesën e parë u shënua vetëm një gol në fund, teksa ishte Polonia që kaloi në epërsi me anë të Jakub Kaçovkës. Në pjesën e dytë të lojës, kuqezinjtë ishin spektakolarë. Shqipëria barazoi fillimisht rezultatin në minutën e 53-të me Gabriel Kullën, teksa sulmuesi kuqezi realizoi një supergol nga goditja e dënimit.
Polonia rigjeti sërish epërsinë në të 56-ën, megjithatë Kulla ishte i pandalshëm dhe barazoi shifrat në 2-2 vetëm 10 minuta më pas. Sulmuesi bëri gjithçka mirë brenda zonës dhe me një goditje të bukur shënoi golin e dytë personal. Shqipëria përmbysi gjithçka në minutën e 79-të me Serxhio Voglin. Mesfushori kuqezi vulosi fitoren spektakolare të Shqipërisë me një gol me kokë nga brenda zonës.
Në fund sfida u mbyll me fitoren e Shqipërisë së Nën-17-vjeçarëve me rezultatin 3-2. Takimi i dytë miqësor midis Shqipërisë dhe Polonisë do të luhet 3 ditë më pas, më 18 nëntor, duke nisur nga ora 10:00, po në “Shtëpinë e Futbollit”. Këto miqësore janë shumë të vlefshme për ekipin kombëtar të Nën-17-vjeçarëve dhe për stafin kuqezi për të testuar sa më shumë lojtarë të rinj dhe për të ndërtuar grupin që do të përfaqësojë Shqipërinë në finalet e Kampionatit Evropian “Shqipëri 2025”.
https://www.youtube.com/live/NCD3aB9EPWI?si=9S3nr2G16IMk9X1N
