ASNN – E fundit që ka hedhur shortin e çerekfinaleve dhe gjysmëfinaleve të saj ka qenë veprimtaria e 3-të e klubeve të kontinentit, Liga e Konferencës. Kështu, është hedhur shorti i çerekfinaleve të Ligës së Konferencës dhe është përcaktuar rruga drejt finales së madhe të Athinës, teksa goglat kanë dhuruar përballje interesante.
Aston Vila, që eliminoi Ajaksin, do të luajë kundër Lilës, ndërsa Fiorentina do të përballet me çekët e Viktorias së Plzenjit për një vend në gjysmëfinale. Derbi i Ballkanit, Olimpiakos-Fenerbahçe dhe përballja Klub Bryzh-PAOK i Selanikut janë dy takimet e tjera çerekfinale.
Ndërkaq, është përcaktuar edhe rruga drejt finales së Athinës, teksa dy prej çerekfinalisteve janë ekipe greke. Fituesja e takimit Aston Vila-Lilë do të ndeshet me fituesen e sfidës Olimpiakos-Fenerbahçe, ndërsa në gjysmëfinalen tjetër do të luajnë fituesja e çiftit Viktoria e Plzenjit-Fiorentina, me atë e takimit Klub Bryzh-PAOK.
Ndeshjet e para të çerekfinaleve do të luhen më 11 prill, ndërsa ndeshjet e kthimit më 18 prill 2024. Gjysmëfinalet e para do të luhen në 2 maj, ndërsa takimet e kthimit më 9 maj 2024. Ndërkaq, finalja e madhe e këtij edicioni të Ligës së Konferencës do të luhet më 29 maj 2024 në kryeqytetin grek.
