ASNN – Federata Shqiptare e Futbollit (FSHF) do të organizojë për të dytin vit radhazi përzgjedhje me futbollistët shqiptarë të talentuar, të cilët jetojnë në Shtetet e Bashkuara të Amerikës dhe Kanada. Përzgjedhjet do të zhvillohen në muajin maj 2024, në kompleksin “Hudson Sports Complex, Warwick NY” dhe do të jenë të fokusuara te lojtarët e datëlindjeve 2009-2010-2011.
Ndërkaq, përzgjedhjet janë të hapura edhe për futbollistet femra pa kufizime moshe. Në këto përzgjedhje me futbollistët e talentuar shqiptarë, të cilët jetojnë në Shtetet e Bashkuara të Amerikës dhe Kanada, do të marrë pjesë edhe Drejtori Teknik i FSHF-së, Fulvio Pea, së bashku me trajnerët e ekipeve kombëtare për këto grupmosha. Përzgjedhjet kanë si qëllim evidentimin e talenteve të reja.
Por në të njëjtën kohë edhe për të parë nga afër progresin e lojtarëve që kanë spikatur në seleksionimet e vitit të kaluar të organizuar nga FSHF-ja. Kjo e fundit ka sqaruar se, për të marrë pjesë në këto përzgjedhje, të interesuarit duhet të dërgojnë disa të dhëna nëpërmjet adresës së e-mailit seleksionime@fshf.al, ku të specifikojnë emrin, mbiemrin, datëlindjen, klubin ku aktivizohen, pozicionin e saktë në fushë, uebin zyrtar të klubit ku luajnë, pasaportën që zotërojnë dhe një numër kontakti.
