ASNN – Paraqitjet e legjionarëve, Cikalleshi dhe Uzuni realizojnë nga dy gola, shënon edhe Manaj. Gjimshiti & Broja japin pasime për gol. Kështu, legjionarët kuqezi po gëzojnë një formë fantastike para grumbullimit të parë për këtë vit me Kombëtaren. Edhe në javën që lamë pas, futbollistët e Kombëtares shqiptare që luajnë në kampionatet jashtë vendit kanë shkëlqyer me klubet e tyre, duke qenë protagonistë me gola e pasime për gol.
Myrto Uzuni zhvilloi një ndeshje të shkëlqyer me Granadën në takimin ndaj Real Sociedadit. Sulmuesi kuqezi realizoi dy gola që në pjesën e parë, fillimisht në minutën e 21-të, falë një 11-metërshi, dhe, më pas, në minutën e 3-të shtesë të pjesës së parë, duke i dhënë sërish epërsinë Granadës. Në fund, sfidën e fitoi Real Sociedadi me shifrat 3-2, por Uzuni u vlerësua si lojtari më i mirë i ndeshjes me notën 8.1 nga faqja e specializuar për statistika, “Sofascore”.
Dy gola realizoi edhe Sokol Cikalleshi në sfidën e Konyaspor ndaj Adana Demirsporit. Sulmuesi i Kombëtares shqiptare zhbllokoi takimin nga pika e bardhë në minutën e 9-të dhe gjeti rrugën e rrjetës sërish me 11-metërsh, në minutën e 45-të. Në fund takimi u mbyll në barazim 2-2, por edhe Sokol Cikalleshi u shpall lojtari i ndeshjes, i vlerësuar me notën 8.3 nga faqja e specializuar për statistika “Sofascore”. Në kampionatin turk shënoi edhe Rei Manaj.
Sulmuesi kuqezi realizoi një predhë të vërtetë nga goditja e dënimit dhe ky ishte goli i 15-të në kampionat me fanellën e Sivasporit. Ndërkaq, kapiteni i Kombëtares shqiptare, Berat Gjimshiti, zhvilloi një paraqitje të shkëlqyer në takimin ndaj Juventusit. Qendërmbrojtësi kuqezi dhuroi pasimin e golit të barazimit të shënuar nga Koopmeiners në minutën e 75-të. Në fund të sfidës, Gjimshiti u vlerësua si lojtari më i mirë në prapavijën e Atalantës, me notën 7.3, nga faqja e specializuar për statistika “Sofascore”.
Protagonist këtë javë ishte edhe Armando Broja në Premier Ligën Angleze, teksa dha një pasim për gol në sfidën e Fulhamit ndaj Vulverhempton Uondërërs. Sulmuesi i Kombëtares shqiptare u aktivizua në minutën e 80-të, kur rezultati ishte 2-0 për Vulverhemptonin dhe, në minutat shtesë, Broja dha pasimin e fundit për Iuobin, që ngushtoi diferencën. Edhe sulmuesi i Shpresave, Kristian Shpendi, vijon të jetë i pandalshëm në Serinë C italiane, teksa shënoi dy gola në takimin ndaj Karrarezes.
Në fund, Çezena e tij u mund 2-3, por kryeson renditjen me 74 pikë, ndërsa Kristian Shpendi shkoi në kuotën e 19-të golave në kampionat. Titullarë me skuadrat e tyre u aktivizuan edhe Ardian Ismajli, Ivan Balliu, Berat Gjimshiti, Arlind Ajeti, Frederic Veseli, Ylber Ramadani, Anis Mehmeti, Qazim Laçi, Nedim Bajrami, Arbnor Muja dhe Mirlind Daku. Ndërkohë dhanë kontributin e tyre si zëvendësues edhe Mario Mitaj, Kristjan Asllani, Keidi Bare, Marash Kumbulla dhe Klaus Gjasula.
