ASNN – Flamurtari “leksion” edhe Teutës e komandon renditjen,Tirana fiton derbin me Partizanin. Kështu, Flamurtari nuk lëshon kreun e renditjes së Kategorisë së Parë të Kampionatit Kombëtar të basketbollit për femra edhe pas javës së 17-të, duke mposhtur në Vlorë skuadrën e Teutës me shifrat 74-45.

Skuadra vlonjate e mbizotëroi ndeshjen gjatë gjithë kohës, duke u shkëputur në pjesën e dytë. Henderson me 29 pikë e 15 topa të zotëruar në tabelë ishte shënuesja më e mirë e ndeshjes. Pa probleme fiton edhe Vllaznia, që mundi 110-49 Barleti Basket, ndeshje ku vajzat shkodrane patën epërsi në fushë.

Shënuesja më e mirë ishte Rreshpja, që realizoi një treshe shifrash të dyfishta (“triple double”), me 43 pikë të realizuara, 10 topa të zotëruar në tabele e 11 pasime për kosh. Nuk zhgënjen Studenti, që falë 25 pikëve e 14 topave të zotëruar në tabelë nga Pëllumbi, mundi 84-55 Elbasanin, por zona e “play-off”-it është larg për kryeqytetaset.

Ndërkaq, derbi kryeqytetas mes Tiranës dhe Partizanit u fitua nga bardbelutë me shifrat 77-67. Një ndeshje me rivalitet shumicën e kohës, vendosur vetëm në 10-minutëshin e 4-t, ku Tirana ishte e papërmbajtshme dhe përmbysi rivalet e kuqe. Shënuesja më e mirë për Tiranën ishte Marina Bojka, me 30 pikë.

Kampionati Kombëtar

Basketboll – Femra

Kategoria e Parë

Java e 17-të:

Studenti – Elbasani                84-55

Flamurtari – Teuta                  74-45

Vllaznia – Barleti Basket     110-49

Tirana – Partizani                   77-67

Renditja

1. Flamurtari             33 pikë
2. Tirana 32 pikë
3. Partizani 30 pikë
4. Vllaznia 27 pikë
5. Teuta                        23 pikë
6. Studenti 23 pikë
7. Elbasani 19 pikë

8.         Barleti Basket           17 pikë