ASNN – Hidhet shorti i Eliminatoreve të “Euro 2025” në futboll për femra, Shqipëria njeh kundërshtaret. Shqipëria e vajzave kuqezi njohu të martën kundërshtaret që do të ketë përballë në Eliminatoret e Evropianit “Zvicër 2025”. Në shortin e hedhur në selinë e UEFA-s në Nion të Zvicrës, Shqipëria është pozicionuar në grupin C5, ku do të përballet me Estoninë dhe Luksemburgun.

Ndeshjet eliminatore do të zhvillohen sipas sistemit vajtje-ardhje dhe sipas kalendarit të UEFA-s, takimet e kësaj faze do të nisin në muajin prill 2024 dhe sfidat përmbyllëse do të luhen në korrik 2024. Pas përfundimit të ndeshjeve eliminatore, do të nisë faza e “play-off”-it. Kombëtarja e vajzave mund të kualifikohet në këtë fazë nëse renditet e para në grupin C, ose si një nga 3 vendet e dyta më të mira.

Në rast kualifikimi për në fazën e “play-off”-it, Shqipëria do të përballet me një nga 4 skuadrat e vendit të 3-të dhe të 4-t të çdo grupi në Ligën A. Ndërsa në vazon e dytë të turit të parë të “play-off”-it do të përballen 4 vendet e para, të dyta dhe të 3-ta të Ligës B me sistem vajtje-ardhje dhe në turin e dytë do të kualifikohen 6 ekipet më të mira. Më pas, skuadrat e kualifikuara për në turin e dytë do të përballen më njëra-tjetrën, po me sistem vajtje-ardhje.

Nga këtu do të përcaktohen edhe 7 ekipet e tjera që do të shkojnë në fazën finale të Evropianit. Gjithashtu sipas skemës së përcaktuar nga UEFA, pesë ekipet e Ligës C që dalin në krye të grupeve përkatëse do të ngjiten direkt në Ligën B.