ASNN – Zv/Presidenti i Federatës Shqiptare të Futbollit (FSHF), Lutfi Nuri, dhe Sekretari i Përgjithshëm i saj, Ilir Shulku, morën pjesë të martën në punimet e Asamblesë së Përgjithshme të Zakonshme të Federatës së Futbollit të Kosovës (FFK), që u zhvillua në Prishtinë.
Në fjalën përshëndetëse të mbajtur para anëtarëve të Asamblesë, Zv/Presidenti Nuri përcolli fillimisht përshëndetjet dhe urimet më të sinqerta të Presidentit të FSHF-së, Armand Duka, për punën e mirë të bërë gjatë vitit 2023 nga FFK dhe sa më shumë sukses në 2024.
“Kjo Asamble është një mundësi e mirë që të gjithë anëtarët e komunitetit të futbollit kosovar të mblidhen për të diskutuar dhe për të marrë vendime të rëndësishme për të ardhmen, – tha Lutfi Nuri në fjalën e tij. – Na vjen mirë të konstatojmë se futbolli në Kosovë ka pasur një progres të vazhdueshëm.”
“Arritja më e madhe e futbollit të Kosovës është padyshim përfaqësimi i Ballkanit në fazën e grupeve të Ligës së Konferencës, një sukses plotësisht i merituar”, – theksoi ai, duke shtuar se përmes mbështetjes nga FIFA & UEFA janë ndërtuar qendra stërvitore e janë përmirësuar disa fusha stërvitore për klube.
Dhe kjo dëshmon, sipas tij, se FFFK është në rrugën e duhur dhe suksese të mëtejshme ju presin. “FSHF-ja ndihet krenare për partneritetin që ka me FFK-në ndër vite e për kontributin që ka dhënë në ndihmë të futbollit të Kosovës, – tha Zv/Presidenti i FSHF-së. – Solidariteti dhe bashkëpunimi janë në bazën e marrëdhënieve tona.”
“Ne do të jemi gjithmonë aty përkrah jush për t’ju ofruar mbështetjen dhe ndihmën tonë të pakursyer për të zhvilluar së bashku lojën tonë”, – përfundoi Zv.Presidenti i FSHF-së, Lutfi Nuri, fjalën e tij duke uruar anëtarët e komunitetit të futbollit në Kosovë punime sa më të mbara të Asamblesë.
