ASNN – Trajneri Bardhi: “Duhet të harrojmë sa më shpejt humbjet, t’i shtrohemi menjëherë punës dhe të kapim sa më shpejt kreun”. Ky ka qenë thelbi i analizës së trajnerit të Besëlidhjes, Sinan Bardhi, ndërsa është këmbëngulur që në janar të bëhen dy-tre përforcime për krijimin e një skuadre të aftë për t’u ngjitur në Superiore.

Analiza e lezhjanëve, pas humbjes me Mamurrasin dhe Burrelin, ka qenë me tonë të qeta, ndërsa është thënë që janë humbur ndeshje të cilat Besëlidhja duhet t’i kishte kaluar me sukses. Dhe në prag është ndeshja me Adën, ndërsa trajneri Bardhi ka dhënë një intervistë për të përditshmen sportive shqiptare, “Gazeta e Sportit”:

– Keni humbur dy ndeshje, ndërsa keni zbritur në vendin e tretë. Si e shihni Besëlidhjen në këtë gjendje?

– Pavarsisht se kemi humbur këto dy ndeshje, më duhet të them se e kemi grupin e lojtarëve në një gjendje shumë të mirë. Nuk mendoj se kemi rrëshqitur aq shumë në renditje sa të mos pretendojmë për t’u ngjitur përsëri në vendin e parë. Do të bëjmë kthesën 360 gradë për t’u kthyer tek fitorja dhe tek objektivi ynë që është kthimi në Superiore.

– Pse ndryshoi kështu kjo Besëlidhje, e cila deri më tani nuk njihte asnjë humbje? Mos ndikoi mungesa e Malos dhe Jakupit?

– Nuk e keni kuptuar që lojtarët tanë nuk dhanë maksimumin dhe as pritshmëritë, sidomos kjo në ndeshjen me Burrelin. Ndoshta ishte pak euforia e rezultateve, ose në një farë mënyre ndikoi dhe humbja në fushën tonë me Mamurrasin, sepse ishte një disfatë që nuk e prisnim. Në futboll ndodhin këto. Do të korrigjohemi shpejt. Në janar do të bëjmë 2-3 blerje të fuqishme që Besëlidhja nuk i ka parë deri më tani. Prandaj fillojmë serinë e fitoreve që sot ndaj Adës.

– Si e shihni stolin e rezervave të Besëlidhjes pasi është folur shpesh që janë lojtarë të cilët në çdo kohë mund të hynë në fushë e të luajnë në formacionin e parë?

– Të them të drejtën sa herë i kemi aktivizuar ato lojtarë, asnjëherë nuk kanë bindur. Nuk kanë dhënë çfarë kërkohet, prandaj në janar, siç e thash dhe më sipër, do të hymë në merkato për të marrë 2-3 lojtarë të fuqishëm.

– Parashikimi për ndeshjen me Adën?

– Nuk do të bëjmë asnjë tolerim, do të kërkojmë fillimin e lojës që në fillim për të qenë të sigurt në vazhdimin e ndeshjes. Dhe këtu do të fillojmë kthesën, ndërsa nuk do ta nënvlerësojmë Adën, pavarësisht se ajo ndodhet në fundin e renditjes në Veri. Ajo ka një trajner shumë të mirë si Kreshnik Krepi, ndërsa besoj se shumë shpejt do ta gjejë rrugën e duhur për kthimin e Adës në mesin e tabelës.