ASNN – Vllaznia, fitore mes tensionit ndaj Tiranës. Fiton 82-77 në takimin që erdhi direkt në RTSH Sport, flasin trajnerët. Të dielën është luajtur edhe sfida e fundit, ajo midis Vllaznisë dhe Tiranës, e vlefshme për javën e 13-të të Superligës së Kampionatit Kombëtar të Basketbollit për Meshkuj, që u fitua nga shkodranët 82-77.
Ndeshja që u luajt në Pallatin e Sportit “Qazim Dervishi” në Shkodër dhe që erdhi drejtpërdrejt në Rrjetin e Radio-Televizionit Shqiptar, pati një ndërprerje në 10-minutëshin e 3-të të saj, për shkak të problemeve të shkaktuara nga tifozeria vendase, që për trajnerin vendas, Damian Bekteshi, sidoqoftë ndikoi.
“Në fakt, ndërprerja e ndeshjes për aq sa zgjati, duket sikur i ftohu lojtarët dhe kjo bëri që t’i lëshojmë parketin dhe epërsinë në Tiranës, – ka deklaruar Bekteshi. – Por skuadra e mblodhi veten dhe më pas treguam karater për ta përmbysur rezultatin. Përgjithësisht jam i kënaqur sepse kjo fitore na kthen si pretendentë në kampionat.”
Ndërsa homologu kryeqytetas, Erkand Karaj, e pranoi se në parket fitoi skuadra më e mirë. “Padyshim që Vllaznia e meritoi fitoren dhe unë dua ta përgëzoj, sepse i bëri gjërat më mirë sesa ne, – ka thënë ai. – Ne nuk arritëm ta ruanim epërsinë që krijuan, megjithëse u munduam të ndryshonim disa gjëra.”
Vllaznia kapërcen mbi Tiranën në renditje, teksa ndan vendin e dytë e të 3-të me Kamza Basket, me nga 21 pikë secila, 3 më pak sesa Besëlidhja kryesuese, ndërsa kryeqytetasit zbresin në vendin e 4-t, me 20 pikë. Me ndeshjen e së dielës u mbyll edhe java e 13-të e Superligës së meshkujve.
