ASNN – Vllaznia, fitore mes tensionit ndaj Tiranës. Fiton 82-77 në takimin që erdhi drejtpërdrejt në RTSH Sport, por u ndërpre 30 minuta. Kështu, të dielën është luajtur edhe sfida e fundit, ajo midis Vllaznisë dhe Tiranës, e vlefshme për javën e 13-të të Superligës së Kampionatit Kombëtar të Basketbollit për Meshkuj. Ndeshja që u luajt në Pallatin e Sportit “Qazim Dervishi” në Shkodër dhe që erdhi drejtpërdrejt në Rrjetin e Radio-Televizionit Shqiptar, pati një ndërprerje në 10-minutëshin e 3-të të saj, për shkak të problemeve të shkaktuara nga tifozeria vendase.

Pasi janë luajtur të shtunën 5 nga ndeshjet e javës së 13-të të nivelit më të lartë të Kampionatit Kombëtar të Basketbollit për Meshkuj, Superligës, të dielën është luajtur edhe sfida e fundit, ajo midis Vllaznisë dhe Tiranës. Ndeshja që u luajt në Pallatin e Sportit “Qazim Dervishi” në Shkodër dhe që erdhi drejtpërdrejt në Rrjetin e Radio-Televizionit Shqiptar, pati një ndërprerje në 10-minutëshin e 3-të të saj, për shkak të problemeve të shkaktuara nga tifozeria vendase.

Në fakt, në një atmosferë të ndezur, Vllaznia e fitoi 10-minutëshin e parë me shifrat 22-14, por ai i  dyti ka qenë edhe më i mirë për Tiranën, e cila do të luftojë pikë për pikë. Sidoqoftë, është Vllaznia që e fiton atë me vetëm një pikë epërsi, 20-19, dhe shkon kështu në pushimin e madh midis dy gjysmave duke kryesuar me 9 pikë epërsi, 42-33. Por 10-minutëshi i 3-të nuk do të nisë normalisht, pasi është goditur stoli i kryeqytetasve dhe loja është ndërprerë, për të rinisur pas plot 30 minutash.

Tirana ka dalë një tjetër skuadër nga dhomat e zhveshjeve, duke e fituar 10-minutëshin e 3-të me një epërsi të dyfishtë, 26-13, por, më tepër se kaq, duke marrë kryesimin e rezultatit pas një gjysmë ore lojë, me shifrat 59-55. Por 10-minutëshi i 4-t dhe i fundit ka folur për vendasit, që do ta fitojnë atë me 10 pikë epërsi, 28-18, dhe do të përmbysin kështu shifrat, duke e fituar gjithë takimin me rezultatin 82-77. Vllaznia kapërcen mbi Tiranën në renditje, teksa ndan vendin e dytë e të 3-të me Kamza Basket, me nga 21 pikë secila, 3 më pak sesa Besëlidhja kryesuese, ndërsa kryeqytetasit zbresin në vendin e 4-t, me 20 pikë.

Kampionati Kombëtar

Basketboll – Meshkuj

Java e 13-të:

Vllaznia – Tirana       82-77

Renditja

1. Besëlidhja                 24 pikë
2. Kamza Basket          21 pikë
3. Vllaznia                     21 pikë
4. Tirana                         20 pikë
5. Apolonia                    19 pikë
6. Teuta                          19 pikë
7. Partizani                    16 pikë
8. Elbasani                    16 pikë
9. Flamurtari                  15 pikë
10. Fieri Basket 12 pikë

11.       Skënderbeu              12 pikë